ORANJESTAD, Aruba – October 2017: Jurainy Luckert tambe ta forma parti di e frontline di e banda nobo “One Of A Kind”, 1OAK. Bos, dedicacion y disciplina ta algun di e esencia pa exito tanto como cantante y como miembro di un banda y esaki ta algun punto cu ta principal pa Jurainy Luckert como artista. Na 1999 su carera a cuminsa na momento cu e talento pa canta a bira mas presente.
Un banda cu sigur a defini e rumbo y habri caminda p’e den e mundo di farandula, di cual e tin unicamente recuerdonan grato, tabata “No Game”. Di akinan a bin experiencianan inolvidabel. Na 2004 a presenta e oportunidad p’e participa pa prome biaha den festival di tumba na Corsou. Akinan cu composicion di Axel Pikero “But’e pa mi zon’e”, el a subi un di e scenarionan mas codicia den region y di cual el a siña grandemente. Den e mesun aña aki Jurainy Luckert a bay studia na Hulanda.
Aki un di dos etapa den su carera como cantante a habri, na momento cu el a haya e oportunidad di por forma parti di un di e bandanan mas renombra te cu dia di awe, esta Cache Deluxe. Durante dos aña el a disfruta, haya experencia y crece den Cache Deluxe, unda el a desaroya su mes musicalmente. Na 2006 el a regresa Corsou, pero cu musica semper den mente. Hunto cu algun colega / amigonan di banda “No Game”, nan a lanta e banda “Show”. Cu e banda aki tambe tin hopi memoria grato pa añadi na e storia tras di su carera como cantante. Na 2008 el a tuma e decision pa bay bek Hulanda. Estudio tabata e parti primordial, pero nunca lagando e pasion un banda. “Canto semper cerca di curason y como tal mi a sigui brinda mi talento na varios banda durante e temporada aki”, asina el a expresa.
Guest Star of Cantante Freelance yudando diferente banda manera entre otro: Gibi Sound – Thank You – Orkesta Pegasaya – AMG y Que Bueno Que Son. Cantando cu diferente banda di entretenimento y orkestanan aki. Jurainy Luckert tabata tin e privilegio di por a presenta na diferente parti di Hulanda, Antwerpen y Francia. Cantando como back up singer na Hulanda hunto cu Que Bueno Que Son pa diferente artista manera Ephrem J, Toke d Keda pa menciona algun. Na 2012 hunto cu Que bueno Que Son nan a compaña Toke d Keda pa St. Petersburg na Rusia como e prome banda di Bachata cu a presenta live eynan.
Na 2013 e cantante a bin establece su mes na Aruba. For di e momento ey te cu dia di awe, farandula di Aruba semper a sa di trat’e cu amor y cariño unda cu el a yega y ta masha agradecido na un y tur pa esaki. “Mi bida artistico como cantante nunca a stop. Mi tabata tin e fortuna di a sigui forma parti di como Freelance Singer cu diferente banda di entretenimento na Aruba como tambe forma parti di e popular banda Rincon Boyz”, el a expresa. Durante temporada di 2015 Jurainy Luckert a forma parti tambe como cantante cu e banda DLS te maart 2016. E tin un trayectorio extenso y cu recuerdonan excepcional como artista di cual e ta sumamente orguyo di cada un di nan.
Un etapa nobo ta bay cuminsa awo cu un banda nobo pa Aruba, caminda hunto nan lo sa di bay trece variedad y sigur hopi sorpresa. Pa Jurainy Luckert ta un placer di forma parti di 1OAK “One of a Kind” pa asina e por sigui trece dushi ambiente musical. Danki na tur fanatico pa semper brinda nan apoyo incondicional y nan ta cla pa pone boso disfruta.