Ganadornan di CBW Ta Biaha pa Miami

Eks organisador principal Blue Bay Curacao Golf & Beach Resort ta bayendo Miami ku e 12 hobennan ku a resulta ganador den e ultimo siman di beisbol di 2016. Nan ta bai presensia e partido di beisbol Liga Grandi, entre Miami Marlins i Giants di San Francisco. Durante di e evento selebra na 2016, Kymani Martijn, Keshore Hinkel, Nathan Castillo, Thaima Maximiliana, Ruchano Petronia, Jandrick Cornelia, Charlie Zink, Gedionne Marlin, Lutson Pieters, Jakey Josepha, Rodolfo Rodriguez i Ceddanne Rafaela a keda skogé komo e talentonan ku a destaka. Nada menos ku Sir Hensley “Bam Bam” Meulens, coach di bateo di San Francoisco i Ben Thijsen coach di e selekshon hulandes tabata esnan ku a hasi e eskogensia. E biahe aki ta bira posibel danki na e diferente entradanan ku a drenta durante di e sena di vindishi tradishonal di CBW 2016

MLB

Djaluna 14 di Augustus ta asina leu ku e talentonan aki, akompañá pa un mayor ta biaha pa Miami. En konekshon ku e desaroyo super positivo di e gran talento Ceddanne Rafaela, e lo no biaha ku e delegashon riba e dia ey. Ceddanne a kaba di firma un kontrakt profeshonal ku e organisashon di Boston Red Sox i konsekuentemente a kuminsa kaba ku su karrera komo parti di Major League Baseball. E grupo grandi ku ta biaha ta hasi esey ku e organisashon di Curacao Baseball Week i Gonzalo Cuales, vosero di e evento aki. Lo biaha tambe den e grupo dos persona ku a “kumpra” e biahe aki durante di e sena di vindishi. E suma ku a keda alkansa durante di e vindishi pa e dos biahenan aki, ta kontribui ku e gastunan total di e bishita na Merka i otro donashonnan ku Blue Bay su CBW ta hasi.

Despues di yega Miami ku PAWA airlines e delegashon lo bai Sheraton Hotel unda e grupo lo hospeda. Su siguiente dia, Marlins di Miami ta spera e delegashon pa mitar di sinku di atardi. Prome ku e enkuentro e delegashon ta haña un tour kompleto di hinter e tremendo estadio aki, unda resientemente e All Star Game a tuma lugar. Despues ko-organisador di CBW, Sir Hensley “Bam Bam” Meulens” lo risibi e delegashon riba e tereno di wega. Despues nan lo tuma asiento pa disfruta di e partido entre Marlins i Giants.

Naturalmente e totalidat aki lo ta un eksperiensia enorme pa e hobennan aki. Djarason mainta lo por interkambia riba loke nan a mira i gosa,  pa merdia e delegashon regresa Korsou, net in dia prome ku skol habri.