Willemstad- Ministerio di Desaroyo Ekonómiko ta invitá empresarionan den sektor marítimo i logístika na Kòrsou, pa partisipá den e Mishon di Reino den kuadro di e Konferensia Marítimo di Panama 2017. E Konferensia Marítimo di Panama ta e eksposishon i konferensia mas prominente na Panama den e sektor di logístika i marítimo. E konferensia aki lo tuma lugá di 12 te ku 15 di Mart próksimo.

Minister di Desaroyo Ekonómiko, sr. Eugene Rhuggenaath,lo guia e mishon komersial aki huntu ku un delegashon di Kòrsou inkluyendo komersiantenan interesá pa partisipá na e konferensia aki.

Pa e empresario e partisipashon aki ta nifiká un oportunidat úniko pa amplia su ret komersial na Panama. E bishita aki lo fasilitá i habri akseso na tantu e sektor gubernamental komo sektor privá di Reino Ulandes, Panama i partisipantenan internashonal. Aparte di esaki e empresario lo tin e oportunidat di presentá su produkto i servisionan na bishitantenan di e e konferensia aki. Mas ku klaro lo tin e posibilidat pa hasi negoshi tambe ku e demas partisipantenan den e mishon aki. De paso, e Kanal di Panama renobá a wòrdu tumá den uso i esaki ta nifiká pues e posibilidat pa proyektonan nobo riba e área aki tambe.

Si akaso bo ta interesá komo empresario pa forma parti di e delegashon di Kòrsou huntu ku Minister di Desaroyo Ekonómiko, tuma kontakto ku nos. Esaki por dor di manda un mensahe elektróniko na agnette.kingswijk@gobiernu.cw òf telefónikamente na e number 462-1444 ekst. 129. Empresarionan interesá tin te ku dia 06 di Febrüari próksimo pa asigná nan empresa pa partisipá.

Bo kontribushon finansiero komo empresario lo konsistí di bo kostonan di partisipashon i bo propio gastunan di biahe i estadia.