WILLEMSTAD:- Resientemente Renaissance Curaçao Resort & Casino den su Ball Room bunita dòrná, un ambiente ameno i eksklusivo a anunsiá su empleadonan i supervisornan di aña 2015 pa respektivamente hotèl i casino. Starbucks tambe ta forma parti di e totalidat aki. Kada kuartal Renaissance Curaçao Resort & Casino ta saka su empleado- i supervisornan di kuartal pa hotèl i casino. For di e ganadónan di e 4 kuartalnan finalmente e empleado i supervisor di aña pa respektivamente hotèl i casino ta wòrdu skohe basá riba e empleadonan ku mas a sobresalí di akuerdo ku kriterionan definí.

Den e industria di hospitalidat, servisio na e kliente i e forma kon ta duna kontenido na esaki ta fundamental. Un otro faktor importante ta e liderazgo demostrá den dunamentu di servisio trahando den ekipo. “Going the extra mile” ta esensial pa hasi e diferensia den mundu di hospitalidat i servisio. Den e kategoria di supervisor: liderazgo, ser un ehèmpel pa empleadonan, dunamentu di sosten, guia i direkshon na e empleadonan ku e enfoke riba e mihó servisio ta esensial.

E empleadonan i supervisornan di aña 2015 pa respektivamente hotèl i casino ta: Vanessa Rosalina, Host Casino Employee of the Year 2015. Candida Gordon, Cage supervisor Casino Supervisor of the Year 2015. Edson de Jongh, Public area cleaner Hotel Employee of the Year 2015. Roann Muñoz, Shift supervisor Starbucks Hotel Supervisor of the Year 2015. Renaissance Curaçao Resort & Casino ta felisitá tur kolega ku e logro importante aki i ta spera di por sigui konta ku nan sosten kontinuo.