WILLEMSTAD- 3 di desèmber 2013:- CTB Europa i Timmendorfer Strand Niendorf Tourismus GmbH e aña aki a sera e promé beach partnership  na mundu. Esaki a tuma lugá durante di e Internationale Tourismus-Börse (ITB) kual ta e feria turístiko di mas grandi na Berlin.  Resientemente a drenta e grato notisia ku e beach partnership aki kual na promé bista ta mustra algu no usual, a keda nominá pa e European Excellence Award. E ‘beach partnership’ a pone e fundeshi pa interkambio di eksperensia i konosementu pa loke ta trata ekspanshon i mehorashon di loke ta keda ofresé na e bishitante di ámbos playa.  Plakatnan konmemorativo a keda desvelá durante un seremonia spesial na tur dos playa pa di e manera ei, e ‘partnership’ ta visibel pa tur bishitante. Risibiendo un nominashon manera esaki ta oumentá e rekonosementu serka bishitantenan di ámbos playa. Pa di 7 bes konsekutivo e European Excellence Awards ta honra proyektonan i kampañanan ku a sobresalí riba tereno di komunikashon. Tabata un kantidat grandi di kompanianan Europeo, agensianan di konsùltent, asosashonnan i NGO’s ku a risibí invitashon pa apliká pa un European Excellence Award na unda un kuerpo di 30 hurado lo evaluá kada aplikashon pa asina skohe esun ku mas a sobresalí. E aña aki European Excellence Awards a registrá mas di 1500 proyekto dirigí riba  komunikashon ku a sobresalí kual a hasi difísil pa huradonan skohe un ganador. Pues pa ta nominá den kategoria di; “Biahe i Turismo” ya ta un éksito total. Dia 5 di desèmber próksimo lo anunsiá e ganadornan durante un fiesta di gala na Munich. CTB ta masha orguyoso di e nominashon aki kual ta fruta di esfuersonan pa konkistá e merkado Aleman i alabes ta den espektativa pa  e resultado final dia 5 di desèmber próksimo.