WILLEMSTAD —  Djarason dia 16 di òktober último, e ekipo di Wildcats kampion di temporada regular di beisbòl di Kòrsou, a presentá su unifòrm nobo. Motibu di e kambio di unifòrm aki a bini despues ku  na luna di ougùstùs un di su spònsernan ku den e kaso aki ta Fatum a kambia den Guardian Group. Manera ta konosí, e ekipo di  BBC Wildcats ta orguyosamente patrosiná pa Guardian Group i Curaçao Airport Partners ( CAP)  ya pa algun aña tras di lomba i resientemente e famia a keda ekspandé pa Mac Donalds ku a bira parti di e organisashon di Wildcats for di adulto te ku mucha. Na okashon di presentashon di e unifòrm nobo, Feko Gomes miembro di direktiva di e ekipo di Beisbòl a para ketu riba e importansia di un spònser sigur den e deporte manera beisbòl. Sr. Rolando Galaraga den representashon di Mac Donalds Kòrsou a mustra ku nan ta kontentu di por ta forma parti di famia di Wildcats i ku nan ta mira un relashon grandi den futuro. Steven Martina, CEO di Guardian Group di su parti a bisa ku pa nan ta un honor di por ta spònser di un ekipo grandi manera Wildcats i e ta sigur ku e aña aki lo ta den grandi pa loke ta trata beisbòl di Kòrsou. E ekipo di  Wildcats na e momentunan aki ta hungando weganan di play off den kampionato di Beisbòl Doble A di Kòrsou. Potrèt: Aki  por mira d.r.p.d. Manfred Gomes, Randy Krindongo, Steven Martina, Rolando Galaraga, Martin O Niel di Guardian Group, i Derren da Costa Gomez.