WILLEMSTAD/ Den luna di Aprel último fanátikonan di tantu Rich Kalashh i Jaido por a tuma nota riba Instagram di algun foto ku ámbos artista a ‘share’. E artistanan tabata na Medellin, Colombia pa grabashon di e videoclip di nan mas resiente produkshon ‘Bazooka’. E ‘track’ nobo ta pa e amante di músika ‘trap’, ounke produktornan a inkluí algun influensia komersial manera e ritmo ‘samba’. Ámbos artista di Decoded lo kuminsa move internashonalmente, e promé stap ta e grabashon di ‘Bazooka’ na Medellin.

E ‘track’ mes ta papia di desafionan den bario i a keda produsí pa Ox i Pastor. No ta promé bes ku Rich Kalashh i Jaido ta traha huntu; nan tin algun ‘track’ sumamente eksitoso. Grabashon di e videoclip a keda hasí dor di Greyan Films. E piesa ya a kuminsa zona na radio. Fanátikonan por sigui Rich Kalashh i Jaido riba nan Instagram i SnapChat. Tur artista di Decoded por wòrdu siguí riba e Youtube Channel @decodedofficial. Por stream riba ITunes, Spotify, Tidal i Apple Music tambe.