WILLEMSTAD – Asina ku e entradanan ta i ta keda strukturalmente ménos ku e gastunan, no tin sentido pa kontinuá un negoshi. A base di esaki direktor Wim Trapenberg mes a entregá e petishon pa deklará e empresa W.G. Trapenberg A/C Service N.V. bankrut. Dia 26 di sèptèmber último korte den promé instansia a deklará e negoshi bankrut, apuntando Mr. P.E. de Kort komo wes komisario i Mr. C.M. van Liere komo kuratòr. E kuratòr ta hasi un apelashon riba kada un ku tin algu di kobra di e negoshi pa manda esaki p’e pa por verifiá un ke otro.

Na 1956 Willem Gerard Trapenberg, ke en pas dekanse, a lanta W.G. Trapenberg A/C Service N.V. Su yu Willem Trappenberg a guia e empresa e último 39 añanan komo direktor. Entre e 47 empleadonan ku a traha te final tin ku a alkansá 10, 25, 35 Йf hasta mas aña di servisio. Apesar di intentonan inkansabel pa bòltu e desaroyo, e gastunan di hiba e negoshi a keda atras kompará ku e entradanan. Esei un dia ta yega na su límite. Hustamente pasobra su tata a lanta e negoshi 62 aña pasá i ku el a logra kontinuá ku e empresa alrededor di kuater dékada, tabata pa e direktor un momento difísil pa disidí pa deskoninuá ku e negoshi. Na mes momento el a realisá ku pa niun di esnan envolví no tabata resolvé nada si a sigui ku e negoshi riba e mesun base. Un konsiderashon di hopi peso den e proseso di desishon tabata e destino di e empleadonan ku awor sikiera por akudí na SVB pa risibí e pago di cessantia ku nan tin derecho ariba.

Direktor Wilm Trapenberg ta gradisido no únikamente na e personal kompleto pa nan dedikashon i profeshonalismo, pero tambe na e klientenan ku aña aden aña afó a demostrá nan konfiansa den e negoshi. Kaminda esaki tabata posibel el a yuda klientenan kaba ku un alternativa.