WILLEMSTAD – Banko di Sanger Kòrsou ta e instituto ku ta pèrkurá pa kolekta i suministrá sanger na nos hospitalnan pa pashèntnan ku tin mester di e líkido presioso aki. Kòrsou den tempu semper ta un di e tiki paisnan ku tin sufisiente sanger. Den transkurso di añanan Banko di Sanger i su profeshonalnan a pèrkurá pa sigui tur e último desaroyonan pa asina garantisá ku Kòrsou su Banko di Sanger ta trata e sanger segun normanan di mas haltu di Oropa, Merka i di Karibe.

Pa por prosesá e sanger di e donante despues di e donashon Banko di Sanger ta hasi uzo di aparatonan super sofistiká i kostoso.

Banko di Sanger ta dispone di un laboratorio kompleto ku personal altamente kalifiká ku ta analisá tur donashon riba e diferente vírus nan. Tur esaki pa por garantisá e kalidat HALTU di e produktonan.

Banko di Sanger ta pèrkurá pa hòspital na Kòrsou, Boneiru i Sint Maarten tin sanger  disponibel. Sin e donante tur esaki no ta posibel. E donante di sanger ta duna parti di su mes pa por yuda otro.

Sinembargo tin hopi hende ku ta duna sanger a bai biba den eksterior i tambe debí na otro faktornan ta pone ku e banko tin ménos donante. Kada hende ku duna sanger ta yuda skapa di tres bida. Banko di Sanger ta saka for di kada saku di sanger tres produkto, esta e plasma, sèlnan kòrá i plachinan di sanger.

• Sèlnan kòrá  ta ser duná na por ehèmpel pashèntnan di hòspital  ku tin anemia
• Plasma ta pa pashèntnan di leukemia ku ta pèrdè sanger pa falta di un nivel abou di plachi di sanger, -thrombocyten-.
• Plachi di sanger ta ser duná na pashèntnan ku tin pèrdida di sanger en kombinashon ku defisiensia di faktornan di kuahamentu di sanger (stollingsfactoren)

Mester tuma akshon rápido i den e kuadro aki Banko di Sanger ta hasi un yamada urgente na hinter komunidat pa bira donante di sanger. Pa bira donante mester registrá i despues di esei ta sigui un kontrol médiko ku Banko di Sanger ta hasi. Si e tèstnan ei bai bon e persona por bira un donante. Pa logra haña mas tantu hende pa registrá Banko di Sanger ta organisá un asina yama ‘donor drive’ den kua e banko ta traha te 6:30 pm den e periodo di 11 pa 15 di yüni 2018. Esaki ta hustamente pa duna espasio na hendenan ku ta traha te atardi i no tin espasio durante di dia pa yega Banko di Sanger.

Djasabra 16 di yüni próksimo lo tin un Dia Habri na Banko di Sanger na Pater Euwensweg ya asina mas tantu hende por akudí i sera konosí ku e banko.

Un yamada na hinter komunidat pa registrá pa bira donante di Banko di Sanger di Kòrsou.