Ta selebrá huntu ku Kòrsou djaluna awor kuminsando 9’or di mainta
WILLEMSTAD: Djaluna dia 21 di mei próksimo ta selebrá un dia históriko pa e famia grandi di Banco di Caribe. E fecha aki ta sirbi komo inspirashon pa kualke hóben ku un dia ke mira su idealnan realisá. Tabata na aña 1973 ku Sr. Eddie de Kort sr. –e tempu ei un bankero hóben- a realisá e soño di tin su mes banko. Riba 21 di mei 1973 a habri portanan di e promé branch di Banco di Caribe, na Handelskade. E tempu ei, a konta ku 6 empleado. Entre nan, 2 tèler i sobrá 4 tabata forma parti di personal di ofisina. Awendia, Banco di Caribe ta konta ku 267 empleado i 5 branch na Kòrsou. Total, Banco di Caribe tin 373 empleado repartí riba 4 isla.
E di dos branch tabata na Schottegatweg, skùin dilanti di e aktual edifisio prinsipal di Banco di Caribe. Despues di un korto tempu Sr. Eddie de Kort sr. a sigui desaroyá su plan pa Banco di Caribe i asina a pasa pa atkerí tereno pa despues konstruí loke awe ta edifisio prinsipal di e banko. Na aña 1983 hustamente riba fecha natal di Sr. de Kort. Banco di Caribe a habri su promé branch na Aruba. Na aña 1987 ta restourá un edifisio na Boneiru pa asina hasi Banco di Caribe operashonal einan tambe, i na 2007 ta habri porta di Banco di Caribe na Sint Maarten. Di 1973 pa 2018, ta resumí kuarentisinku aña di determinashon, dedikashon i konfiansa!
Banco di Caribe na 2018
Sr. Fons Simon, CEO i General Managing Director di Banco di Caribe huntu ku e tim di maneho, i hunta di komisario a sigui fortifiká e posishon di Banco di Caribe den e merkadonan Kòrsou, Boneiru, Aruba i Sint. Maarten i ta premirá desaroyonan positivo pa Banco di Caribe durante di e añanan benidero. Banco di Caribe a demostrá di ta un banko ku vishon! E aña aki a prepará den grandi; e tim di maneho di Banco di Caribe lo tei for di 9’or di mainta pa gradisí nos komunidat pa e konfiansa brindá.
Invitashon: Selebrashon 45 aña Banco di Caribe
E selebrashon lo kuminsá for di mainta 9’or riba e sitio di parkeo na edifisio prinsipal riba Schottegatweg di Banco di Caribe klientenan i komunidat di Kòrsou ta wòrdu invitá pa e tradishonal salú ku bolo. Parti mainta Cafe Barista lo repartí kòfi, te, chukulati i Nini’s Johnny Cake. Lo tin animashon di Norman Moron Trio. Parti mèrdia lo tin algu pa sisti e stoma i lo repartí pasaboka di trùknan di pan Kòki Riba Blòki i Hot Pepper miéntras tin animashon di Grupo Kompèr i Dj RO-1. E selebrashon públiko ta terminá 3’or di mèrdia.