Hasi uso di bo tarheta di débito pa kobra bo penshon

WILLEMSTAD:  Banco di Caribe ta anunsiá ku penshonadonan por kobra nan penshon di SVB entrante  29 di aprel, 2020. Un bes mas ta apelá na tur penshonado ku tin un tarheta di débito pa hasi uso di un di e ATMnan di Banco di Caribe stratégikamente situá riba nos isla pa kobra nan penshon. Den kaso ku e kliente no tin un tarheta di débito, por pasa kobra e penshon na filial di Sta. Maria, Otrobanda i Saliña entre 8’or di mainta i 12’or di atardi.  Banco di Caribe ta informá ku por kobra penshon después di dia 29 di aprel tambe.

Banco di Caribe ta suprayá ku e medidanan relashoná ku COVID-19 ta keda vigente den tur filial i pa esaki ta pidi koperashon pa tene e distansia sosial rekerí i sigui instrukshon adishonal di e kuerpo di seguridat. Porfabor no bishitá banko si esaki no ta nesesario. Tambe, ta pidi indulgensia ya ku na momento di reforsá e medidanan, e proseso di pago por dura un poko mas ku normal; lo permití únikamente un sierto kantidat di hende simultaniamente den e filial.  Si bo ta sufri di kebranto di salú, preferiblemente no bishitá banko. Den esaki, ta hasi un petishon na esnan mas hóben pa duna un man na e grandinan ku lo tin mester di yudansa. Pa mas informashon por yama departamento di servisio na kliente di Banco di Caribe na telefòn 432 3200 durante e orario di ofisina adaptá, kual ta di 8 am pa 12 pm.