Willemstad – Novèmber 2015: Banco di Caribe ta lansa su wèpsait nobo, moderno, agradabel i fásil pa usa. Meta di e wèpsait di Banco di Caribe ta pa hasi e búskeda di informashon fásil pa e kliente i na  mes momento ofresé un eksperensia plasentero.  Ademas e bachi di  ‘BdC Online’ a kambia pero e funshonalidat a keda igual.  

E wèpsait ta ofresé e bishitante posibilidat pa risibí kontesta riba mayoria di pregunta ku e por tin. Esaki ta posibel den e sekshon di ‘FAQ’.  Ademas, por apliká pa diferente produkto i servisio, por ehèmpel un MultiCard.  MultiCard ta un tarheta pre pago, fásil pa usa ora di bai di biahe, shop online òf simplemente komo un regalo. Tambe por haña riba e wèpsait un servisio nobo ku ta un kalkuladó ku ta duna e kliente un indikashon di kuantu e lo paga pa luna na momento ku e disidí di kumpra un kas ku un finansiamentu hipotekario di Banco di Caribe.

E wèpsait ta prinsipalmente dirigí riba merkado di Kòrsou, pero pronto lo ekspandé pa tur e merkadonan na unda ku Banco di Caribe ta operashonal. Un di e kambionan ku tin un impakto mashá positivo ta ku e wèpsait nobo ta ‘mobile friendly’, pues su diseño ta ahustá na un ‘tablet òf smartphone’.  Su ‘responsive mode’ ta altu i esaki ta nifiká ku e ta aksesibel pa e usuario na unda ku e ta. Pa un eksperensia optimal di e wèpsait Banco di Caribe ta rekomendá e kliente usa Internet Explorer 10 òf mas resien òf Google Chrome.

Di akuerdo ku Banco di Caribe, “E diseño renobá di e wèpsait ta kumpli ku nos meta di duna informashon kla i ofresé un funshonamentu simpel. Nos ta invitá tur hende pa bishitá nos wèpsait i kompartí ku nos nan eksperensia i rekomendashonnan. Un wèpsait ta algu bibu i ta kambia kontinuamente; ku koperashon di nos klientenan nos ta sigui desaroy’é”.