CEO di Banco di Caribe; “Nos tin e nesesidatnan bankario

di e nómada digital lokal bon na bista.”

WILLEMSTAD:  Pa di dos aña konsekutivo JCI IOBA Curaçao ta organisá e seminario ku enfoke riba ‘Digital Nomad’, i Banco di Caribe ta orguyoso di un biaha mas por patrosiná esaki. Aña pasá, a introdusí e konsepto di un nómada digital durante un anochi di deskubrimentu masha eksitoso. Tabata notabel e kuriosidat i interes serka públiko na Kòrsou pa e estilo di hasi negoshi riba distansia. Un tema sigur ku ta balelapena eksplorá; kiko e estilo di bida empresarial aki por nifiká pa nos ekonomia? Djamars último sr. Fons Simon CEO di Banco di Caribe a reuní ku un nómada digital pa skucha kiko e nesesidatnan bankario di e grupo aki ta.

Despues di e kombersashon ku Sra. Sugeidy Windster, un berdadero nómada digital, Sr. Fons Simon ta splika ku nan tin e nesesidatnan bankario di e nómada digital lokal bon na bista.  “Pronto nos lo ofresé mas solushonnan práktiko pa e grupo di empresario aki. Un empresario ‘on the go’ mester por atendé su asuntunan bankario unda ku ta, i ki ora ku ta. E aplikashon mobil di Banco di Caribe por ta un hèrmènt hopi útil pa un nómada digital”. Sra. Gina Francisca i Sr. Richards Martina di JCI IOBA Curaçao tambe tabata presente na e kòmbersashon masha ameno ku a tuma lugá den sentro di siudat Punda.

Tokante di seminario ‘Digital Nomad’ 2019:

Tema di e seminario lo ta ‘Remote work works; Running your business on the go’. E aña aki lo enfatisá riba e benefisionan pa e klase trahadó. Durante di e seminario lo elaborá riba vários tópiko interesante manera ‘Strategia pa kombersá ku doño di trabou riba trahamentu riba distansia’, e futuro di entrepreneurship den Caribe i muchu mas. Pa ken e seminario aki ta? E seminario lo brinda informashon na e persona lokal ku por ofresé su servisio na mundu henter, empresarionan, institutonan gubernamental i tambe na e nómada digital ku ta buskando su siguiente destinashon.

Banco di Caribe komo patrosinadó di e evento ta invitá tur ku ta sinti nan mes atraé na e tema moderno aki pa bishitá e seminario dia 23 i 24 di ougùstùs na ouditorio Banco Sentral di Kòrsou i St. Maarten. Pa mas informashon por bishitá www.nomadparadise.org