Djadumingu awor!

WILLEMSTAD: Sosten na proyektonan di formashon sosial i artístiko di hóbennan na Kòrsou semper tabata un prioridat pa Banco di Caribe. E aña aki, Bos di Hubentut por bolbe konta ku sosten di Banco di Caribe pa dos di nan programanan; Kibrando e Gritunan Silensioso (KGS) i Brigada di Seguridat i Formashon (BSF).

Kibrando Gritunan Silensioso (KGS) tin komo meta pa prevení abusu seksual di mucha i hóben. Tarea di Bos di Hubentut den e programa spesífiko aki ta pa konsientisá nos komunidat riba e tópiko. Parti di e proseso ta siña mucha i hóben nan derechonan, esaki ta sosodé na diferente manera e.o via obranan teatral, kurso na skolnan di fundeshi i sekundario, programa na televishon i radio i konferensia pa hóben.

Seminario “Let’s Talk: Mom & Me”

Djadumingu dia 8 di aprel, Bos di Hubentut lo presentá un seminario interesante pa tur yu muhé riba 10 aña di edat i nan mama. E seminario “Let’s Talk: Mom & Me” (Safety Edition) lo tuma lugá den ouditorio di International School for di 1’or di mèrdia pa 7’or di anochi. Partisipashon na e seminario “Let’s Talk: Mom & Me” ta kosta 25 florin pa persona, inkluyendo un T-shirt, algu di kome i bebe.

Abusu Seksual un tópiko mashá importante!

E tópiko di ‘abusu’ no mester spanta ni e mayor, ni e hóben. Ta importante pa ámbos sá kon pa protehé nan mes kontra kualke tipo di abusu, primordialmente abusu seksual. Nos tur ta konsiente ku tin hopi gritu silensioso den nos komunidat, buskando yudansa pa un problemátika ku den transkurso di añanan a bira hopi mas serio. Banco di Caribe ta kere den e meta di Fundashon Bos di Hubentut i ta enkurashá mamanan pa bishita e seminario “Let’s Talk: Mom & Me” ku nan yu muhé. Mihó prevení, ku lamentá. Por kumpra karchi na Mensing’s Caminada, Beep Beep , 24 Uur Uit De Muur, Fundashon Bos di Hubentut i Mundo Nobo.