WILLEMSTAD:  Fin di siman tras di lomba e tim di Banco di Caribe a sa di gana e di dos edishon di Curaçao Corporate Challenge. E aktividat a tuma lugá na kompleho deportivo Suffisant. E kompetensia organisá den esfera sosial pa Rotary Club of Curaçao ta hasi ku empresanan lokal, ademas di traha riba motivashon i trabou den ekipo, por interkambiá ku otro i den forma deportivo midi forsa pa rekoudá fondo pa un bon kousa.  Fondonan rekoudá ta bai  pa proyektonan sosial; E aña aki, mas ku 1,000 mucha lo risibí sosten via un di e programa eskolar ku ta enserá  donashon di paña, sapatu, material di skol i muchu mas.

For di 10’or di mainta e timnan a reuní; e weganan a keda repartí den henter e área na kompleho deportivo Suffisant. Algun di e weganan na kua e timnan mester a partisipá tabata gòlf, kana ku webu riba kuchara, estafèt, mímika i tambe partisipá na un scavenger hunt. E aña aki a konta ku partisipashon di 10 tim formá  pa diferente empresa lokal.  Ademas di e diferente weganan e tim di Banco di Caribe a partisipá na un kompetensia di baile tambe, aki nan a sali na di 3 lugá.  Banco di Caribe ta felisitá Rotary Club Of Curaçao ku e organisashon di e di dos edishon di Curaçao Corporate Challenge. E dia tabata unu mashá eksitoso.

Sr. Fons Simon, CEO di Banco di Caribe a felisitá e tim bisando, “Nos ta gradisí nos tim ku a partisipá na e kompetensia den fin di siman último i  tur kolega ku a  apoyá nan durante e Curaçao Corporate Challenge. Gana e kompetensia aki ta konfirmá boso empeño pa traha huntu i alkansá ekselensia. Boso a demostrá ku trabou den ekipo ta kore  manera un liña kòrá den nos empresa. Masha pabien !”