The Annual Fitness Challenge un éksito rotundo

WILLEMSTAD: Den fin di siman último Banco di Caribe a duna su aporte na e di ocho edishon di “The Annual Fitness Challenge” di Fundashon Alton Paas.  Ta despues di dos aña ku a bolbe organisá e aktividat deportivo-sosial aki. “The Annual Fitness Challenge” a tuma lugá na International School i partisipantenan por a bishitá tres diferente área di moveshon físiko, kaminda a ofresé programanan di ehersisio, spinning i kaminata. Esaki ta e aktividat pa rekoudá fondo di mas grandi pa e fundashon. Fundashon Alton Paas ta traha tur dia pa  mehorá kalidat di bida di personanan ku ‘dwarslesie’ i otro problemanan neurológiko. E “Annual Fitness Challenge” ta trese komunidat huntu pa move, rekreá i alabes rekoudá fondo pa esnan ku ta move ku difikultat.   

Tokante Fundashon Alton Paas

E vishon di e fundashon ta pa inkluí personanan desabilitá mas tantu posibel den nos komunidat, i ta hasi esaki dor di kubri ehersisionan spesial, transporte adekuá pa esnan den ròlstul i evento sosial. Aparte di esaki, e fundashon ta ofresé su “Wheelee Service” ku ta un servisio di transporte spesial pa yuda esnan den ròlstul ku transporte mas fásil di manera ku nan por sali nan kas i keda aktivo sosialmente. Fundashon Alton Paas realmente ta un gran kontribuyente na e komunidat desabilitá; asina por menshona ku na e AP Center ta ofresé personanan ku ta sufri di parálisis e posibilidat pa hasi diferente ehersisio i terapia pa nan por sigui move.   Banco di Caribe ta sostené e vishon di Fundashon Alton Paas i pa medio di e kontribushon hasí ta apoyá e inisiativanan di e fundashon pa sigui konsientisá nos komunidat i pa mehorá e kalidat di bida di personanan desabilitá.  

Banco di Caribe ta felisitá Fundashon Alton Paas ku otro tremendo edishon di ‘The Annual Fitness Challenge” i ta deseá nan hopi éksito ku futuro evento di manera ku por kontinuá ku nan proyektonan promoviendo inklushon. Personanan ku ta deseá di hasi un donashon na Fundashon Alton Paas, por hasi un transferensia digital fásilmente na atenshon di Fundashon Alton Paas; Winkelcentrum Colon Unit 4, number di kuenta 31285401 na Banco di Caribe.

Riba imágennan athunto por tuma nota di partisipantenan ku a bini huntu pa disfrutá i move durante e diferente aktividatnan di “Annual Fitness Challenge 2023”.