WILLEMSTAD:  Den fin di siman tras di lomba a tuma lugá e Carifta Junior Chess Championships. Banco di Caribe ta sumamente orguyoso di por a forma parti di e gran evento aki. Sr. Dito de Kort, managing director  di Banco di Caribe a duna sosten na e kompetensia i tabata presente na seremonia di apertura. “Nos ta masha orguyoso di por a forma parti di Carifta Junior Chess Championships, ta un plaser pa mira un spiritu kompetitivo, na un edat asina hóben serka e partisipantenan. Nos ta felisitá tur 55 ahedresista lokal ku a representá Kòrsou, partikularmente Frederic Simonis (U12), Ailen Oriana Mena (U20) i Mariana Sanchez (U20) ku a keda premiá den nan respektivo kategoria. Masha pabien!”

E di 8 edishon di Carifta Junior Chess Championship ku a tuma lugá wikènt pasá na Hilton Hotel Curaçao por a konta ku partisipashon di ahedresista di Antigua & Barbuda, Aruba, Bahamas, Barbados, Bermuda, Guyana, Jamaica, Sürnam, Trinidad & Tobago, US Virgin Islands i Kòrsou. Un total di kasi 185 hóben te 20 aña a kompetí den diferente kategoria di edat. Ta trata di 130 ahedresista di e 10 islanan bishitante i 55 hungadó di Kòrsou. E paisnan ganadó a resultá Jamaica, Trinidad & Tobago i Sürnam. Kòrsou su ahedresistanan a resaltá den kategoria U12 na unda ku Frederic Simonis a resultá na di dos lugá, den kategoria U20 Damas, Ailen Oriana Mena a konkistá e promé lugá i finalmente den e mesun kategoria, Mariana Sanchez ta ubiká na terser lugá. Sigur un bon prestashon pa Kòrsou.