Un aporte balioso na formashon di e muchanan

WILLEMSTAD- OKT 2017:  Esaki ta e di 3 aña konsekutivo ku Banco di Caribe ta aportá na e programa di ‘Bayena i Dòlfein’ di Dolphin Academy.  Sinku klas, di sinku diferente skol básiko lo tin e oportunidat di partisipá na e programa aki.  Djamars último, grupo 5 di St. Paulus College a bishitá Dolphin Academy i a keda risibí pa Banco di Caribe i e instruktornan di e programa edukativo. 

For di 2005, muchanan di Kòrsou ta risibí e oportunidat pa partisipá na e proyekto di Dolphin Academy. E meta, ta pa duna tur mucha di Kòrsou informashon tokante bayena i dòlfein, bida marítimo i kon pa konservá esaki. Durante di e mainta edukativo e muchanan ta mira algun pelíkula di dòlfein, presensiá entrenamentu di e dòlfeinnan, haña sunchi di dòlfein i tuma nota di e señalnan ku entrenadó ta duna na e dòlfein durante di kada funshon.  Konsiderando ku e dolfinarium ta un atrakshon turístiko frekuentemente bishitá na Kòrsou, e ta importante pa nos muchanan ta na altura di e aktividatnan ku ta tuma lugá na Dolphin Academy.

E aña aki Banco di Caribe a adoptá algun klas di P.L. Brionschool,  St. Paulus College,  Glorieux College , Divi Divi Lomschool i  J.F. Kennedy School. Sra. Jetha Römer, marketing manager i Sr. Dito de Kort , managing director na Banco di Caribe tabata presente djamars último pa dirigí algun palabra na e muchanan.