WILLEMSTAD- yüni 2015; Djasabra awor lo kuminsá ku remodelashon di e fachada di edifisio prinsipal di Banco di Caribe na Saliña. E trabounan preparatorio lo kuminsá djasabra dia 13 di yüni próksimo; for di e dia aki e tereno parti ariba na unda ku e edifisio ta situá lo no ta aksesibel mas pa outo. Esaki ta nifiká ku klientenan no por subi bin ‘ariba’ ku outo pa parker. Ta hasi apelashon na klientenan pa parker outo na e tereno grandi ku tin ‘abou’ situá na Jupiterstraat, ku tambe ta tereno di Banco di Caribe.

Pa algun tempu kaba Banco di Caribe ta den un proseso di kambio di diseño di empresa ku ta inkluí entre otro dokumento, material di promoshon, edifisio etc. Den e fase aktual, ta toka turno na edifisionan di Banco di Caribe.

Durante di e periodo di remodelashon Banco di Caribe Saliña ta keda habrí  na e orarionan kustumbrá tantu den siman komo riba djasabra. Lo ofresé tur servisio usual. Segun gerensia di Banco di Caribe e trabounan ta ekstenso pero sigur ta sirbi prinsipalmente pa mehorá servisio; ta p’esei mes ta pidi komprenshon di e kliente. Na momento ku e trabounan di remodelashon na e fachada di edifisio prinsipal tèrminá i ku por hasi uso bèk di e lugánan di parker parti ‘ariba’ na e edifisio, lo anunsiá esaki. Banco di Caribe ta gradisí tur kliente di antemano pa nan pasenshi i ta pidi diskulpa pa kualke inkumbinensia ku e trabounan por trese kuné.