Pa di 5 aña konsekutivo:

Willemstad –Yüni 2013: Tabata djaweps anochi den Tula Room di Kurá Hulanda ku entre 11 empresario hóben a skohe esun mas kreativo i mas impaktante pa loke ta trata e produkto òf servisio ku e la introdusí den nos merkado. Pa 5 aña konsekutivo Banco di Caribe ta sostené e proyekto i asina konhuntamente ku JCI IOBA Curaçao ta garantisá su kontinuidat ku enfoke riba desaroyo duradero i kresementu di e empresario hóben. E partisipantenan di e aña akí tabata; Stephany Fransisca di Beterzorg B.V, Veronique Toulon di Cherie’s, Tatiana Saturnino-Felix di Tera Percussion, Renato Ignacio di Minubia, Tiffany Cristina di Kinderopvang Arko di Iris & Rainbow Unique, Shamiro Anita di CFS Solution,Valerie Diemont di Mastermind Coworking, Melinda Domacasse di Caribbean Holistic Institute, John Pandt di Think Bright, Gino Jacobs di Skempi i Merelyn Remak di GlitzCupcakes. Sr. Fons Simon, CEO i General Managing Director di Banco di Caribe na e okashon di entrega di e Creative Young Entrepreneur Award 2013 a reflekshoná riba importansia di ‘small businesses’ pa nos ekonomia. “Loke ta drei nos ekonomía ta empresanan chikí ku ta ofresé diversidat, produktividat i empleo na mas ku mitar di nos merkado laboral. Den un ekonomía manera esun di Kòrsou kreatividat, inovashon konstante i konosementu di merkado ta di vital importansia. E empresario hóben ta determiná pa alkansá éksito, esaki a keda demostrá durante 5 aña kaba. E sosten di Banco di Caribe na e proyekto di Creative Young Entrepreneur a yuda mantené tur 5 empresa ganadó, e tempu ei hóben i awor empresa chikí, riba pia i eksitoso.  Banco di Caribe tei pa brinda un aporte èkstra na e empresario hóben pa garantisá kontinuidat di nan negoshi i den forma strukturá yuda nan na kresementu. Nos ta felisitá tur diesun partisipante di JCI CYEA 2013 i spesialmente, Sra. Tatiana Saturnino- Felix di Tera Percussion ganadora di e aña akí”.

Riba foto athuntu por mira momento ku e ganadora di e aña aki, Sra. Tatiana Saturnino_ Felix di Tera Percussion ta risibí su chèk na balor di 10,000 florin for di Sr. Fons Simon, CEO i General Managing Director di Banco di Caribe.