Entrenadornan lokal tambe a risibí klínika di Real Madrid djasabra último

KRALENDIJK: “Banco di Caribe ta konsiderá e klínika un oportunidat úniko pa e hóben lokal. Nos patrosinio na e Fundashon di Real Madrid ta konfirmá nos kompromiso pa yuda komunidat ku proyekto pa desaroyo di mucha i hoben, esaki di akuerdo ku sr. Carol Winklar di Banco di Caribe Boneiru. Banco di Caribe huntu ku ENNIA ta anunsiá patrosinio di e klínika na Boneiru dia 12 pa 16 di ougùstùs. Djasabra último entrenador di Fundashon Real Madrid sr. Brian van den Bergh, a train i selekshoná e trainernan lokal ku lo bai duna e klínika. Sra. Ginia El Hage – Cicilia di Banco di Caribe i sra. Dalitza Rijna di ENNIA Boneiru tabata presente na stadion di Kralendijk pa animá e muchanan.

Durante e entrenamentu djasabra último kasi sinkuenta mucha a benefisiá di kapasitashon di nos ‘coachnan’ ku na nan turno a haña oportunidat di apliká nan konosementu i téknikanan di futbòl di Real Madrid. E echo ku Fundashon Real Madrid a skohe Boneiru tambe komo area di desaroyo pa e deporte di futbòl ta di aploudí i sigur lo alsa nivel di nos talentonan ku posibilidat pa ehersé e deporte akí den eksterior.

Tokante e klínika di Fundashon Real Madrid

Na Boneiru 80 i na Kòrsou 125 mucha lo partisipá; e muchanan di entre 6 i 17 aña di edat lo partisipá den dos diferente kategoria. E klínika aki na Boneiru ta wòrdu organisá pa e organisashon di futbòl lokal SV Real Rincon, konhuntamente ku Real Madrid. Na final di e klínika dos mucha/hóben, huntu ku nan entrenador lo biaha pa Madrid, Spaña i einan partisipá na un klínika di e tim di Real Madrid. Partisipando na e klínika e hóbennan lo risibí nan unifòrm, tur artíkulo di e ekipo spañó i algun dia di téknika i táktika intensivo. Den transkurso di añanan Fundashon Real Madrid a organisá alrededor di 474 klínika di futbòl den 45 pais. Mas di 47,853 hóben a benefisiá di e programa.