Na kaminda pa Carifta Junior Chess Championships

WILLEMSTAD: Na aña 2013 Banco di Caribe a kuminsá un laso di koperashon ku Curaçao Chess Academy (CCA) pa duna inisio na un proyekto na unda ta duna lès di ahedres. Na inisio di e proyekto ‘Lès di Ahedres’ a stipulá algun meta pa e akademia, i den korto tempu por a tuma nota ku e grupo di studiante a krese i e interes pa e wega tambe. Esei mes a hasi ku na 2016, CCA a tene un torneo ku a resultá mashá eksitoso. Awor na 2019, Banco di Caribe ta kontentu di kontribuí ku Curaçao Chess Federation pa realisashon di Carifta Junior Chess Championships ku lo tuma lugá den luna di Aprel próksimo.

“Un patrosinio di Banco di Caribe ta kana pareu ku un liña di maneho, na unda ta stipulá meta, konsientisá komunidat riba e proyekto spesífiko i ta stimulá kresementu i progreso di e proyekto òf fundashon. Nos koperashon ku CCA a kuminsa na Sentro di Bario Sta. Maria i Sentro di Bario Montaña kaminda muchanan ta risibí konosementu general di e wega di ahedres kombiná ku informashon spesífiko di nòmber i nifikashon di e piesanan. Ahedres ta sostené e hóben den su desaroyo i su patronchi di pensa. Ademas, e ta stimulá konsentrashon, pensamentu lógiko, promové independensia i motivá pa aktua ku disiplina. Banco di Caribe den su afan pa yuda stimulá mucha i hóbennan pa nan kontribuí positivamente na komunidat di Kòrsou ta mira den e deporte aki un medio pa logra esaki i ta masha orguyoso di por kompañá Curaçao Chess Federation riba e trayekto pa Carifta Junior Chess Championships”, esaki di akuerdo ku Dito de Kort, Direktor Komersial di Banco di Caribe.