22 studiante a batayá den kompetensia di ahedres di Curaçao Chess Academy

WILLEMSTAD- Resientemente Curaçao Chess Academy (CCA) den koperashon ku Banco di Caribe a organisá un tremendo kompetensia di ahedres pa e muchanan ku aktualmente ta praktiká e deporte na sentro di bario Sta. Maria.  Pa di tres aña konsekutivo, Banco di Caribe ta patrosiná proyekto di ahedres pa mucha den algun bario lokal.  Na inisio di e proyekto “Lès di Ahedres” na 2013 a stipulá algun meta pa e akademia, i por tuma nota ku durante di e último 3 añanan e grupo di studiante a krese i e interes pa e wega tambe.

E wega di ahedres ta sirbi komo un forma pa sostené e mucha den su desaroyo i patronchi di pensa. Ademas e ta stimulá konsentrashon, pensamentu lógiko i stratégiko. Tabata un plaser pa mira un kantidat di 22 hóben ambisioso batayá durante di e kompetensia.  Finalmente e hóben Jurgen Elles a resultá ganadó, basá riba e kantidat di puntonan di resistensia ku e hóben aki a logra akumulá.  Masha pabien tambe na Frederic Simonis, Daniela Wanga, Jovan Maduro, Jonathan Bregitha, Nathan Dunker, Tagesyah Marcos, Noah Comes Cassares, Aarona Koenraad, Xavier Werleman, Daniel Léañez i Aviandrie Castablanc ku a resultá di ta e hóbennan sobresaliente durante di e torneo.

Sra. Valeri Andrea, representante di Banco di Caribe a hasi entrega di e premionan den e diferente kategorianan, despues di atmirá e hóbennan den akshon.  Durante klousura, e lidernan di Curaçao Chess Academy a ekspresá gratitut na Banco di Caribe pa nan koperashon i sosten finansiero. Tur mayor ku ta interesá pa nan yunan sigui e lèsnan di ahedres por akudí na Sentro di bario Sta. Maria. E lès di ahedres ta brinda e muchanan konosementu general di e wega di ahedres den kombinashon ku saber spesífiko di nòmber i nifikashon di e piesanan, meskos tambe kon pa move e piesanan i kon pa plania e wega. Ta duna lès tur djasabra mainta entre 10’or di mainta i 12’or di mèrdia na Sentro di Bario Sta. Maria na Seru Fortunaweg.