WILLEMSTAD:-  Banco di Caribe ta preparando tur su ATMnan pa por lesa informashon di tarhetanan ku ‘chip’.  Esaki ta hasi e transakshonnan na e ATMnan mas seif pa kliente ku ta hasi uso di e servisio aki.

E ‘upgrading’ di ATM ta trese un kambio den prosesamentu na momento di hasi un transakshon ku e tarheta ku tin ‘chip’. Ora e kliente hinka e tarheta ku ‘chip’ den un ATM di Banco di Caribe, e mashin lo pidi e kliente pa porfabor warda un ratu, lo sali riba pantaya ‘please wait a moment’- esaki ta momento ku e ATM ta lesando e informashon ku tin den e ‘chip’. Despues di algun sekònde e kliente por sigui ku e transakshon manera usual.  Si e tarheta di e kliente no tin ‘chip’, e ATM lo usa e informashon di e strepi magnétiko pa prosesá e transakshon.

Banco di Caribe ta realisando e ‘upgrade’ den diferente fase i den tur merkado Aruba, Boneiru, Kòrsou i Sint Maarten.  Entretantu tin algun ATM di Banco di Caribe na Kòrsou ku ta kla kaba pa aseptá tarheta ku ‘chip’. Nos ta gradisí tur kliente pa nan komprenshon. Pa mas informashon por bishitá www.bancodicaribe.com òf yama 432-3200  pa mas informashon.