…enkonekshon ku dia internashonal di hende grandi…

WILLEMSTAD- Òktober 2013: Resientemente Banco di Caribe a realisá un donashon signifikativo na kas di kuido Betèsda, esaki enkonekshon ku dia di nos grandinan. Tabata djarason último ku representantenan di Betèsda a bishitá Banco di Caribe pa risibí e donashon. E donashon risibí ta pa kontribuí na kreashon di un ‘kamber di sosiegu’. E kamber aki lo brinda habitantenan di Betèsda un área di silensio i trankilidat. E meta di e ‘kamber di sosiegu’ ta pa optimalisá e bienestar general  serka kada un di e habitantenan ofresiendo un ambiente trankil ku kolonan neutral, efekto di lus, músika suave i material pa stimulá serenidat.  Ademas di esaki e kamber lo por rebibá fragmentunan di pasado serka e habitante dunando nan un oportunidat di disfrutá di rekuerdonan bunita. Banco di Caribe ta konsiente di e importansia pa ofresé un bon kuido na nos grandinan, un sala pa habitantenan disfrutá di trankilidat i momentonan di reflekshon ta ideal. Di akuerdo ku Sr. Fons Simon, CEO di Banco di Caribe, “Nos grandinan ta representá un generashon di balor, prinsipio i trabou duru. Unabes ku nan ta den un kas di kuido, nan mester sinti nan mes sigur i trankil. Despues di tantu aña di dedikashon na nos komunidat, nan meresé e trankilidat di bon kuido”. Pa finalisá, gerensia di Banco di Caribe a deseá Betèsda éksito ku e proyekto. Riba foto athuntu, por mira momento ku Sr. Fons Simon, CEO di Banco di Caribe ta hasi entrega di e chèk simbóliko na Betèsda.