Muchanan den categoria 1 a ricibi nan premio

ORANJESTAD: Diabierna ultimo Banco di Caribe a haci entrega di premio na ganadornan di Festival di Canto Bos Escolar, edicion ‘Cultural’.  Manera tur hende sa diadomingo ultimo a tuma lugar e festival di canto y muchanan por a participa den 3 categoria. Categoria 1 tabata pa muchanan di 3 pa 6 aña, categoria 2 pa muchanan di 7 pa 10 aña y categoria 3 pa muchanan di 11 pa 13 aña. Den tur categoria e scolnan lo ricibi un premio efectivo. Banco di Caribe ta masha orguyoso di por a patrocina categoria 1 den e festival di canto. Sr. Elvin Maduro, Managing Director di Banco di Caribe tabata tey diabierna ultimo na Arco Iris Kleuterschool pa haci entrega di e premionan na muchanan den e promer categoria.

Promer lugar den e festival a ricibi un premio di Awg. 1.000, di dos lugar a ricibi un premio di Awg. 750 y tercer lugar a ricibi un premio di Awg. 500.  Banco di Caribe ta felicita tur e ganadornan di Festival di Canto Bos Escolar, edicion ‘Cultural’ principalmente tur esunnan den categoria 1. Pabien na Kate Ras cu a representa Scol basico Washington y a resulta na promer lugar, tambe Zoë Orman cu a representa Arco Iris Kleiterschool y a resulta na di dos lugar, Kylie Kelly cu a representa Arco Iris Kleuterschool y a keda na tercer lugar, Vira Richardson cu a representa Mon Plaisir Kleuterschool y a finalisa na di cuarto lugar y finalmente Hailey Koolman cu a representa Imelda Kleuterschool y a keda na di cinco lugar.

Di acuerdo cu Sr. Elvin Maduro, Managing Director  di Banco di Caribe nan ta masha orguyoso di por a duna un aporte na e festival di canto di Muchanan Sabi y ta spera cu tur mucha a keda inspira den e trayecto pa sigui desaroya nan talento. Un pabien na tur mucha y na tur esunnan cu diabierna ultimo a ricibi nan premio.