WILLEMSTAD- Tur hende tin un kurason, un par ta salú i otro nò. Si bo por a mira bo kurason, lo bo kuid’é mas? E por hasi un diferensia grandi si for di awor nos pone atenshon riba dje. Den kuadro pa sigui yuda konsientisá nos komunidat pa pone mas atenshon na nan kurason, BECEL, KIA, Maduro & Curiel’s Bank, Curaçao Lions Club i É Bon Yu di Kòrsou a djòin un biaha mas pa huntu organisá e kaminata “Ban Move Awor”. Aparte ku kanamentu semper ta super bon pa salú, tur loke keda generá pa medio di e kaminata aki ta bai pa un bon kousa. Moises de Marchena ku ta e kompania representante di e produkto BECEL, un margarina ku ta kontené Omega 3 i 6 ku ta yuda tene bo kurason i arterianan salú, a skohe Curaçaosche Hartstichting komo e organisashon ku lo risibí e montante ku keda generá pa medio di e kaminata “Ban Move Awor”. Curaçao Lions Club tambe lo hasi un donashon na Curaçaosche Hartstichting pa kada T-shirt ku keda bendé. Maduro & Curiel’s Bank, É Banko Amigu di deporte, pa di tres aña konsekutivo ta un di e patrosinadonan di e grandioso kaminata “Ban Move Awor”. Banda di sostené diferente ramo di deporte, MCB ta duna su sosten na “Ban Move Awor” pasó ta un kaminata ku henter famia por partisipá n’e i kanamentu alabes ta tene nos mente i kurpa den bon kondishon i salú. TeleCuraçao i TC FM ta stimulá tur bon Yu di Kòrsou pa Ban Move Awor. E bon Yu di Kòrsou ta konsiente di su salú i ta tene su kurason den bon kondishon usando Becel. Hasiendo ehersisio tambe ta mantené e salú. “E Bon Yu di Kòrsou” tambe ta “Ban Move Awor”. E kaminata “Ban Move Awor” ta tuma lugá djadumingu 24 di ougùstùs 2014 i ta start 7:00^or di mainta. E kaminata ta start na Showroom di KIA na Saliña i partisipantenan ta kana un distansia di 7 kilometer. Pa tur persona ku ta interesa, T-shirt pa adulto ta NAf. 15,– i NAf.5,– pa mucha te 12 aña. E aña aki tin e oportunidat di spar 2 kuip di Becel i bo ta haña NAf. 5,– deskuento riba bo T-shirt. Tambe na kompra di bo T-shirt bo ta risibí un kupòn pa yena ku chèns di gana 2 karchi di entrada pa Curaçao North Sea Jazz Festival 2014. Kada persona lo risibí un T-shirt koló blanku, un saku ku fruta, algu di bebe durante i na final di e kaminata. Promé ku salida, tur partisipante tin oportunidat pa midi nan preshon grátis na Showroom di KIA kuminsando 6:00^or di mainta. Pa lòs e múskulonan lo tin un seshon di Zumba di 30 minüt ku ta start eksaktamente pa 6:30^or di mainta. T-shirt ta optenibel for di 11 di ougùstùs na Showroom di KIA (na Saliña) durante oranan di ofisina i serka miembronan di Curaçao Lions Club. Tambe por kumpra bo T-shirt den algun supermarket durante siman i wikènt. Like nos Facebook Page “Ban Move Awor” pa bo keda informá i sintonisá bo radio TC FM den wikènt pa informá bo mes unda nos tim ta bai ta pa bo pasa kumpra bo T-shirt p’e kaminata i alabes midi i chèk bo preshon. Pa loke ta trata e aspekto di seguridat, organisashon di ‘Ban Move Awor’ tin máksimo atenshon pa seguridat di tur partisipante. Kuerpo polisial ta enkargá pa sera e kayanan di e ruta. Un apelashon sinembargo na tur partisipante pa keda riba e ruta stipulá i sigui e reglanan ku e tim di seguridat i polis duna. Si akaso un partisipante kansa, lo tin vehíkulonan bon identifiká ku lo baha bo kaminda bo ta deseá riba e ruta. Rode Kruis tambe lo tei pa duna un man manera semper. BECEL, KIA, Maduro & Curiel’s Bank, Curaçao Lions Club i É Bon Yu di Kòrsou ta invitá un i tur pa Ban Move Awor ku henter bo famia, djadumingu 24 di ougùstùs i alabes yuda kontribuí ku Curaçaosche Hartstichting.