Willemstad- Djadumingu 3 di Mei, The Grateful Youth den koperashon ku JCI CLIC ta organisá un kaminata titulá “The Walk of Appreciation – Pay it Forward!” E meta di e kaminata ta pa stimulá nos komunidat pa move i apresiá nos salú. Alabes ta pone atenshon i importansia di enseñansa primaria den nos komunidat. Ku e kaminata aki The Grateful Youth ke rekoudá fondo i hasi un renobashon total na Arko-Iris Belevingscentrum. Di e forma aki e hobennan ta mustra nan gratitut i apresio na e skol ariba menshoná. Partisipando na e kaminata abo ta garantisá ku e generashon nobo tambe por sigui haña guia, formashon i e estimulo nesesario pa bira un futuro lider den nos komunidat. The Grateful Youth ta un grupo di hoben entre 17 pa 19 aña, ku a reuní ku e meta pa yama danki na Arko-Iris Belevingscentrum pa tur loke nan risibi den e temporada ku nan a bishita e skol aki. E proyekto aki ta kana bou di guía di JCI CLIC. E lema di JCI CLIC pa e aña aki ta “Creating All Leaders of Tomorrow”. Guiando e tim di The Grateful Youth, JCI CLIC ta kreando lidernan di mañan ku ta krea un kambio positivo den nos komunidat. JCI Creative Leaders In Curaçao (konosí antes komo Female Jaycees ku un historia eksepshonal, i después JCI Curaçao Wayaka a modernisá bou di e nòmber JCI CLIC) ta un di e 4 organisashonnan lokal ku ta afiliá na Junior Chamber International (JCI). JCI ta e organisashon mundial di lidernan entre 18 pa 40 aña ku ta dediká na trese kambio positivo den nos komunidat. E aña aki ta selebra 40 aña di eksistensia di e organisashon local i alabes 100 aña di e moveshon mundial di Junior Chamber International (JCI). Bo koperashon pa e evento aki ta solamente 15 florin, i bo ta risibí un t-shirt i konsumo. Buska bo karchi pa e kaminata na Albert Heijn Zeelandia promé ku nan kaba. Pa mas informashon i karchi por yama 688-5846, 698-6769 of 540-0303.