Celebra Starbucks Global Month Of Service

ORANJESTAD- April 2015: Diasabra awo ta e dia! Ban cana y tene curpa den condicion; na mes momento celebra luna di servicio na comunidad hunto cu Starbucks. Durante e luna aki, tur Starbucks rond mundo ta pone atencion na ‘Global Month of Services’. E aña aki un bes mas a pone enfasis riba e importancia di un bida saludabel y e movecion fisico cu ta rekeri pa mantene e curpa ‘op en top’. Ya pa 2 aña consecutivo e caminata a resulta un gran exito, esey mes ta e motibo cu e aña aki a dicidi pa cumpli cu demanda popular y un bes mas organisa e caminata. E aña aki ta bolbe uni forsa cu IBISA pa realisa e evento dedica na salud y ta yama bon bini na un otro organisacion cu ta join e ‘fun walk’, esta I Love Aruba. Pa participa na e caminata diasabra awor por registra na Starbucks Renaissance Marketplace pagando solamente Afl. 10.00. Tur entrada di registracion lo bay pa Aruba Animal Shelter. E caminata lo sali 5:30PM for di Fishermen’s Hut rumbo pa Arashi. Tur participante tin chens di gana premionan atractivo despues di e caminata. Esunnan cu ta desea di participa na e caminata aki cu nan T-shirt por cumpra esaki na Starbucks Renaissance Marketplace; ideal pa un grupo di amigo(a), famia, colega. Durante di e caminata lo tin animacion y musica dor di DJ Oscar Booy. Starbucks ta invita pueblo di Aruba pa forma na e caminata diasabra awor y celebra nan ‘Global Month of Services’. Forma bo team y participa! Registra trempan pa e caminata, ademas di ta ‘fun’ e lo ta pa un bon causa. Bisti bo keds y algo comodo, prepara pa bo tambe cana hunto cu Starbucks diasabra awo.