WILLEMSTAD:-  Ámbos agrupashon musikal no tin mester di niun introdukshon, tur dos ta kerí i gustá den e públiko bailadó. Ta despues di hopi tempu a logra ‘buk’ ámbos agrupashon musikal pa un solo fecha di presentashon, OREO i Tsunami huntu riba un anochi den Brakkeput Mei Mei! For di djabièrnè ku a anunsiá esaki, medionan di komunikashon sosial a kai den un ‘hype’ formal pendiente pa mas informashon. E fecha, 6 di sèptèmber a keda skohe pa presentá e kombinashon aki;  pa e djasabra anochi aki e kombinashon lo ta den tres- OREO i Tsunami for di Aruba miéntras ku ERA lo representá Kòrsou den e totalidat.  Pa promé bes e kombinashon aki den Brakkeput Mei Mei for di awòki ya kaba por premirá ku e fiesta aki lo ta un éksito. Pre-benta di un kantidat di karchi limitá a keda skematisá pa dia 24 di yüli na NAf 50- pa despues sigui ku e trayekto di promoshon i benta pa e fiesta dia 6 di sèptèmber próksimo. A skohe pa anunsiá e fiesta trempan, ya tur hende por tene kuenta i reservá e fecha. Un anochi di goso i bailamentu….hit tras di hit, un tras di otro. Den transkurso di e próksimo dianan lo duna mas detaye di benta di karchi i sekshon di VIP pa e fiesta aki. Claudius Phillips & OREO despues di su último presentashon na Kòrsou a bai laga un hit atras ‘Midnight Train’ ku diariamente por wòrdu skuchá na diferente radio-emisora, ademas di esaki su hitnan di semper no mester di niun introdukshon. Tsunami ta un di e agrupashonnan musikal ku a sakudí Kòrsou ku nan piesanan; e kantante di primera Sasha a kousa gran impakto ku su sensualidat- awòki Tsunami ku un hit nobo “Doce Rosas” i nan repertorio musikal di hit só, lo laga públiko bailadó riba pista henter anochi. Nan último presentashon kantu di awa- a laga nan fanatikonan ku gana di un okashon baliabel… pues esaki lo ta e fiesta mes mes! ERA, ta un di e orguyonan di Kòrsou pues ta premirá un otro gran presentashon di nan parti. Reservá 6 di sèptèmber!