WILLEMSTAD – Ku orguyo Baker Tilly Kòrsou ta presentá su identidat nobo, e logo i posishonamentu “Now, for tomorrow”. E revishon aki ta debí na un ‘rebranding’ mundial na unda ku tur ofisina di Baker Tilly,- accountancy i asesoría den impuesto- ta adoptá e identidat nobo for di awe, djaluna dia 3 di desèmber.

E ‘rebranding’ ta enfoká riba fortifikashon i modernisashon di nos ofisina den tur merkado- dirigí riba nos klientenan, koleganan, nos servisio di accountancy i asesoría den impuesto i tambe nos komunidat. Tur elemento ta klave den deskripshon di loke Baker Tilly ta para pe. A tene kuenta ku koló, tipo di lèter, imágen i aplikashon.  Managing partner Eric Vesseur di Baker Tilly Dutch Caribbean ta splika, “Banda di nos ekspertisio i kapasidat pa sirbi klientenan lokal i internashonal na e nivel di mas haltu, nos ta deseá pa Baker Tilly su marka ta sinónimo di e relashonnan duradero ku nos a bin ta krea ku nos klientenan. Esaki ta loke ta separá Baker Tilly di otronan. Nos ta tuma desishonnan pa un futuro duradero pa tur kliente, kolega, nos propio trabou i nos komunidat. For di awe, “Now, for tommorow” ta sentral den nos marka i nos komunikashon.”

Partner Victor Bergisch ta añadí; “Kresementu ta núkleo di nos servisio na kliente. Nos logo nobo ta inspirá riba e patronchi di kresementu orgániko di nos naturalesa. E ta pone énfasis riba nos fleksibilidat i e habilidat di adaptá na nesesidat di kada kliente. E logotipo a keda revisá i awor ta kompletamente na lèter chikí i pegá na otro. E ta reflehá e aksesibilidat i servisio na nos klientenan i e konektividat den nos área di trabou.”

E identidat nobo di Baker Tilly ta un refleho di e ofisinanan di Baker Tilly situá rònt mundu; huntu nos a yega na un imágen. Despues di un kresementu konstante i un desaroyo positivo di Baker Tilly durante di e último 20 añanan, awor ta e momentu pa skohe un identidat mundial nobo. Un imágen unifiká ta duna un mihó bista di ken nos ta, kiko nos ta hasi i kon nos ta operá den tur nos merkadonan.

E identidat nobo ta bai ‘live’ awe na Kòrsou, Aruba, Boneiru i St. Maarten, meskos ku den otro 130 merkado den kual ta ofresé e nivel haltu di accountancy i asesoría di impuesto bou di e nòmber di Baker Tilly.