WILLEMSTAD – Promé ku yama bon bini na otro aña eskolar, Renaissance Mall i Rif Fort ta invitá tur mucha i hóben pa forma parti di e ‘Back to School Fountain Party’ dia promé di ougùstùs próksimo. Esaki ta un ‘fiesta’ ku lo brinda diferente aktividat spesial pa mucha i hóben. Ta garantisá dibertishon, alegria i goso total. Ambiente lo kuminsá for di 12’or di mèrdia i ta skematisá pa terminá 6’or di atardi, entrada lo ta grátis. 

Renaissance Mall i Rif Fort lo pèrkurá pa weganan di awa riba e fòntein di Renaissance Mall, pintamentu di kara, tayer di arte i obra di man, ponementu di Henna Tattoo, show di magia presentá dor di Tom Presti, show di sirko ku payaso i akrobat, ‘bouncers’, kabaitu, presensia di karikaturistanan di ‘Minions’ i ‘Olaf’ di e pelíkula pa mucha ‘Frozen’ i muchu mas. Ademas di esaki, lo tin demostrashon di Departamentu di Brantwer i Rode Kruis di entre 2’or i 6’or. Komo chèri riba e bolo e trùk Didi’s Cupcake lo ta di parker mei mei riba e tereno di Renaissance Mall pa asina brinda un i tur e posibilidat di kumpra algu di boka dushi durante e fiesta.

Tur hóben i mucha di Kòrsou ta keda invitá pa sera nan vakashon den un ambiente familiar. Bishitá Renaissance Mall i Rif Fort dia promé di ougùstùs próksimo i disfrutá di un atardi yená ku aktividatnan. Por shòp i disfrutá di e restorantnan ku lo ta habrí durante nan orarionan normal riba e dia aki. Renaissance Mall i Rif Fort ta wardabu pa bo tambe disfrutá di e ‘Back to School Fountain Party’.