31 di mei awor e ta kla pa presentá su organisashon nobo na pueblo di Kòrsou

Willemstad – despues di semper yuda i kopera ku diferente organisashon i “miss”nan durante transkurso di añanan, awor Ayanette Statia tin su mes organisashon pa organisa sertamen di beyesa riba nivel lokal ku representashon internashonal.

Ayanette no ta deskonosí den e mundu di beyesa aki na Kòrsou, debí na su eksperensia tantu lokal komo internashonal i tambe su presensia kontinuo den e mundu di beyesa pa hopi aña kaba aki na Kòrsou.

Ayanette a kuminsá na edat yòn komo partisipante, tambe el a desaroyá su eksperensia komo guia i/òf mènedjer pa diferente otro hóben, for di 2012 Ayanette ta bezig ofisial ku su skol di beyesa pa mucha, i alabes a yuda diferente organisashon den maneho i a eksperensia sertamen komo un mayor.

Ta direktor di su mes organisashon awor, ta un faseta nobo, interesante i eksitante. Tur kos ta kla prepará pa 31 di mei próksimo Ayanette presentá su organisashon nobo na pueblo di Kòrsou riba e plataforma di facebook.

Ayanette ta invitá pueblo di Kòrsou pa djaluna 31 di mei proksimo pa 6’or di atardi, sigui e transmishon bibu riba su pagina di facebook kaminda lo transmití un bunita evento bibu. E ta un produkshon di nivel manera semper a kustumbrá di Ayanette. Tambe lo koroná e promé dos beyesanan ku ta bai representá Kòrsou bou di e organisashon nobo.

Apesar di e tempu difísil ku mundu ta pasando aden, ta super importante pa nos keda positivo i optimista. Danki na tur spònsor ku ta kere den e proyekto.