Paga na resibu na CPost ta manera paga na kaha di UTS

Willemstad 7 di yüli 2015- Resientemente CPost i UTS a sera un akuerdo ku ta hasié posibel pa klientenan di UTS hasi pago di nan kuentanan atraves di e diferente punto i solushonnan di pago ku CPost ta ofresé, di tal forma ku bo saldo na UTS ta keda adaptá mesora.  E akuerdo aki entre e dos kompanianan di gobièrnu ta produkto konkreto di e plan di maneho “Horizonte 2030” di e Ministerio di Tráfiko, Transporte i Desaroyo Urbano, mr. Suzanne Camelia-Romer kaminda ta pone énfasis riba kolaborashon entre servisio i kompanianan di gobièrnu pa asina logra mas efisiensia, efektividat i mihó servisio na bienestar di pueblo.  Sr. Paul de Geus, CEO di UTS i Sr. Franklin Sluis, CEO di CPost a firma e akuerdo aki ku ta marka inisio di un kolaborashon ku mester resultá den mas i mihó servisio pa e kliente di UTS.

“Nos di CPost ta desaroyando nos mes, komo parti di kreashon di nos modelo inovativo, den e punto kaminda e hende mester ta pa tur su obligashonnan di  e.o. pago.  Di un banda nos ta fasilitá bida di pueblo i di otro banda nos ta tuma riba nos enkargo, ku no ta unu kardinal, di empresanan ku ta ofresé servisio.  Ku nos filialnan kumbiniente situá na Punda, Otrobanda, Groot Kwartier i Santa Rosa nos ta fásil alkansabel i kla pa sirbi un i tur.   E kliente awor ku CPost full-online i real time ku e sistema di pago di UTS ta sigurá ku ora e paga na un filial di CPost mesora su saldo di su kuenta na UTS ta keda ahusta.  CPost di e forma aki ta duna kontenido real na e plan di maneho ´Horizonte 2030″ di gobièrnu”  Sr. Franklin Sluis CEO di CPost a bisa.

Di su parti Sr. Paul de Geus di UTS  a bisa ku e paso aki ta den liña di e maneho di UTS pa konsentrá riba e loke e kompania ta lider den dje esta ofresé e mihó i mas moderno servisio i produktonan di telekomunikashon na un preis hustu.   UTS semper tabata i ta keda un empresa inovativo ku ta liderá desaroyonan den nos komunidat.  UTS  mihó ku ningun otro kompania ta komprondé ku e yu di Kòrsou moderno ta demandá kòmfòrt ora ta trata kumplimentu ku su obligashonnan.  E akuerdo aki ta un paso konkreto den kumpli ku e demanda ei.

Komunidat por sigui konta riba mas inovashon produkto di e kolaborashon entre CPost i UTS den kuadro di realisashon di maneho ´Horizonte 2030″ di Ministerio di Tráfiko, Transporte i Planifikashon Urbano.