WILLEMSTAD – Ya ta bai hasi 5 aña kaba ku Renaissance Curaçao Resort a habri su portanan na Kòrsou.  Un proyekto ku tabata destiná pa e isla aki. For di e promé intenshon te na e último detaye di ehekushon a pensa riba Kòrsou su hendenan, su posishon komo isla den Karibe  i komo produkto turístiko. “Renaissance mester ta un proyekto di Kòrsou pa Kòrsou”, esaki di akuerdo ku su fundador, Sr. Eduardo De Veer. Awor, despues di 5 aña e área na unda ku ántes tabata tin instalashonnan di Aqualectra ta kompletamente desaroyá. Mirando bèk, Renaissance a resultá di ta un proyekto di Kòrsou pa Kòrsou. Ta konta ku un hotèl, casino, dos shopping mall i restorantnan di gran variedat kulinario. Yanüari  2005 a kuminsá ku e preparashonnan i medio 2005 a muda e ofisina prinsipal di MetaCorp pa Rif Fort. Tabata na 2006 ku a kuminsá ku konstrukshon di e resort, suprayando e filosofia di e kompania mama, MetaCorp trahando duru, ku deligensia na un proyekto ku lo a ofresé Kòrsou i su hendenan ekselensia. No a divulgá muchu na promé instante; di akuerdo ku e filosofia di MetaCorp a papia poko i laga resultadonan papia pa nan mes. Poko poko pero sigur komunidat a bin mira e intenshonnan di e proyekto; mas kupo di trabou pa nos mes hendenan, un hotèl, kasino i un mall mas ku lo por ofresé servisio di primera na e bishitante di e isla i asina por sigui menshoná. Renaissance Curaçao ta ofresé no únikamente e bishitante, pero tambe nos mes hendenan un eksperensia kompletu. Sea ta pa ‘shopping’ ‘breakfast, lunch òf dinner’ òf un estadia den un hotèl òf bishitando e kasino na unda ta garantisá standartenan haltu den servisio. Na luna di mei di 2008, a tene un marshe di trabou na unda ku tur esnan ku tabata interesá pa traha na Renaissance Curaçao Resort por a apliká pa un posishon. E resepshon di parti di e buskadó di trabou i públiko engeneral inkluso mandatarionan i dignatarionan tabata abrumador. For di mitar di ocho di mainta tabata tin fila di hende pa apliká- miéntras e marshe di trabou mester a kuminsá 9’or di mainta. Ehekutivonan na e momentu ei a konfirmá, ku un di e ingredientenan prinsipal di Renaissance Curaçao Resort lo ta su hendenan. E entusiasmo tabata enorme. A risibí durante e marshe di trabou  mas di 800 aplikashon kompletá. E siguiente paso tabata pa strukturá tur kos i kuminsá ku un preselekshon di kandidatonan pa yega na 300 empleado. Awe na 2014, nan tin alrededor di 450 empleado direktamente empleá na e hotèl i casino. Tur kompania huntu di MetaCorp na Kòrsou tin alrededor di 550 empleado. Okupashon di e hotèl a surpasá lokual a wòrdu presupuestá i di akuerdo ku ehekutivonan di Renaissance Curaçao Resort nan tin ekspektativa positivo pa e aña aki. Di akuerdo ku ehekutivonan di Renaissance Curaçao Resort, “Nos hendenan i nos klientenan ta lokual ta mas importante den nos organisashon. Nos a sera diferente aliansanan lokal i internashonal importante ku a kontribuí na e éksito di e hotèl i casino durante e último 5 añanan. Ku mira pa futuro nos lo kontinuá ku e strategia di sera akuerdonan estrecho ku nos partnernan pa di e forma ei nos por garantisá un futuro positivo pa e hotèl, casino, nos trahadónan i pa Kòrsou. Nos ke gradisí pueblo di Kòrsou na promé lugar pa e sosten i apoyo, tambe na tur ku a kontribuí ku nos den e 5 añanan aki. Nan por sigui konta ku nos. Huntu nos por sigui logra un desaroyo positivo!”. Lo selebrá e 5 aniversario di Renaissance Curaçao Resort na un manera eksepshonal. Dia promé di febrüari próksimo Renaissance Rif Fort ta ekstendé invitashon na tur su klientenan i pueblo di Kòrsou pa forma parti di un dia yená ku selebrashon i ofertanan spesial. Kuminsando for di den oranan trempan di mainta tur esnan ku bishitá Renaissance Mall lo por disfrutá di ofertanan spesial na: Zazou, Ema Tei, Sunspec, CurAloe, Mon Art, Rif Fort Beauty Babor Spa, Swatch, Del Sol, BCBGMAXAZRIA, Maxmara, Panache, Guess, Freeport, Swarovski, R-Glass, Jewelines, Penha, Totto i mas establesimentu. Ademas di esaki lo tin presentashon live di High Way Band riba Renaissance Fountain Plaza for di 3’or pa 6’or di atardi. Pa kompletá e selebrashon lo repartí bolo i algu di bebe pa públiko despues di 3’or di atardi.