Willemstad, Durante di “2017 CHTA MarketPlace in the Bahamas” siman pasá a otorgá e premio di Expedia, “Expedia’s Top partner on Curaçao 2016” na Avila Beach Hotèl. E agensia di biahe, Expedia, ku ta esun mas konosí na mundu, a nombrá Avila Beach Hotèl, ku a kaba di kumpli 68 aña di eksistensia riba promé di febrüari, komo e hotèl mas popular na Kòrsou.
Evaluashon
Tin diferente komponente ku ta sòru pa un hotèl meresé di risibí e símbolo prestigioso aki. No ta solamente e kantidat di kamber ku a bende pa anochi pero tambe si tin oumento den e kantidat di kambernan bendé (subida di 59%). Tambe ta wak e averahe di e tarifa pa dia (averahe di tarifa a subi ku 13%), e volúmen di benta di e hotèl a aumentá ku 87% kompará ku e aña anterior. Kolaborashon entre tur dos partido, apresiashon riba plataformanan online (averahe di 8,3 for di 10) tur tin influensia. Avila Beach Hotèl tabatin e volúmen di benta di kamber mas haltu di tur e partnernan di Expedia na Kòrsou (aparte di e hotelnan “All Inclusive”).
Kurso nobo
E premio di Expedia ta un bunita rekompensa pa famia Vogels ku e aña anterior a kambia e rumbo di e hotèl pa loke e ta awor aki. Gerente general, Robbin Vogels a duna di konosé “ Aña ku a pasa nos a tuma un rumbo nobo ku un estilo nobo ku hotèl. Aparte di esei nos tin nos wèbsite nobo i un blog ku ta pone énfasis riba merkadeo riba plataforma online ku tambe ta trese kambionan riba e merkado. Pa e motibu ei nos ta pone mas atenshon pa mehorá e kalidat di nos restorantnan, bar i tambe nos 150 kambernan i apartamentonan. Danki na tur e trahadónan paso sin nan aporte i e kariño ku nan ta duna na trabou i na e huéspetnan nos lo no a logra e kresementu eksepshonal ku nos tin”.
Futuro
Avila Beach Hotèl ta kontinuá ku e aspirashon pa sigí mehorá e kalidat di e restorantnan, kambernan i nos servisio. Historia di e hotèl ta hopi importante komo ku e ta e hotèl mas bieu operashonal na Kòrsou. E hotèl no ta traha solamente pa mehorá túrismo riba e isla pero tambe pa e durabilidat i e komunidat di Pietermaai. Komo ku Robbin Vogels a keda nombrá, miembro di direktiva di CHATA, e lo pone mas enfasis pa kontinuá ku e esfuersonan ya hasi durante e aña.