WILLEMSTAD —   Resientemente e kompania nobo di aviashon di Kòrsou ku ta pendiente su pèrmit ekonómiko, AVA Curaçao a firma un Letter of Intent ku World Fuel International ku mester proveé servisio na e kompania di Kòrsou asina ku e kuminsá bula pa merkadonan Nort Amerikano, Sentro i Sur Amérika i tambe Karibe. Manera ta konosí, na komienso di e aña aki, AVA Curaçao a hasi petishon na Departamentu di Aviashon Sivil di Kòrsou, pa bini na remarke pa risibí un  pèrmit ekonómiko.  E proseso aki ta kanando i representantenan di AVA Curaçao ta warda kana konforme prosedura. Sinembargo, pa por kuminsá adelantá diferente kos ku lo tuma tempu, ya AVA Curaçao a negoshá i a firma un Letter of Intent ku World Fuel International ku tin su sede na San Jose Costa Rica.