Aruba ta para den porta di un bataya si mester brinda e fenomeno aki e chens di crece aki na Aruba of frena e inventario cu tin. Gobierno di Aruba tin respet pa e inventario existente di acomodacionnan All-inclusive pero ta kere cu si e inventario den cantidad di camber di acomodacionnan All-inclusive mester aumenta cu esaki lo trece cu ne varios consecuencianan negativo pa nos isla. Tin un cantidad grandi di rapport y articulonan internacional cu ta demostra e impacto negativo cu ta bin na momento di aumenta inventario di un pais cu mas acomodacionnan All-Inclusive.

Como ehempel por mira e rapport di UK Tourism Concern na 2014 cu ta papia riba e impacto negativo cu tin pa entre otro e propio empleadonan y tour operadornan local.

Turistanan cu ta nervioso of hopi consciente cu nan situacion financiero, a haci e paketenan di All-inclusive un area creciente den e industria di turismo. Popularidad di paketenan di vacacion unda tur cos ta paga di antemano ta creciendo. Pero ta trata netamente e turistanan cu ta biaha cu un limitacion financiero y no ta contribui facilmente na economia di e pais. Esaki tin consecuencianan devastador pa tur cu ta depende di turismo.

E rapport ta referi na un investigacion cu a keda conduci na hotelnan di Tenerife, Kenya y Barbados. Na e destinacionnan menciona a constata cu empleadonan di e resortnan All-inclusive ta traha den condicionnan cu mas stress y cu orarionan mas largo compara cu otro hotelnan, mirando cu e huespednan ta keda na e propiedad durante nan estadia . Adicional a menciona tambe cu empleadonan no ta ricibi e tips cu tanto nan ta depende di dje.

Mark Watson lider di UK Tourism Concern durante e entrevista ta indica cu turistanan na momento di cumpra e paketenan vacacional cu acomodacionnan All-inclusive, nan ta keda notifica cu nan seguro di biahe no ta cubri nan na momento cu nan sali for di e propiedad. Esaki ta haci cu nan no ta sali di nan hotel. Bisando esaki ta obvio cu e paisnan mes no ta beneficia di e turistanan aki mirando cu nan ta keda den un resort cu tin su propio bar, restaurantnan, entretenimento, cual tur ta paga adelanta lagando incentiva minimo pa e turista sali for di e hotel y explora entre otro cultura local. Bisando esaki ta trata aki di e turista cu netamente Aruba lo no beneficia di dje. Aruba pa e ultimo añanan ta trahando duro pa logra trece un fluho di turista cu tin e forma pa contribui grandemente cu economia di nos Pais. E turista cu ta interesa pa sali y cumpra na nos negoshinan local, pa experencia cultura di Aruba. Un turista cu ta paga un tour pa conoce nos isla. Un bishitante cu no tin miedo di haci uzo di nos taxinan pa yega na nos museonan of negoshinan den nos centro di ciudad por ehempel. E turista afluente. Pero na mes momento Gobierno no kier exclui ningun bishitantenan pa bin disfruta di nos isla. Tin hopi mercado pa explora y mirando cu tin un tendencia creciente pa e mercado di All-inclusive, e mandatario ta kere den un balans saludabel. Dentro di poco Minister Oduber lo ta den parlamento pa presenta un cambio di ley. E balans ideal den e concepto aki lo limita e inventario total di cambernan tipo All-inclusive na Aruba na un maximo di 40% . Actualmente e ta na un 32%. Un reto cu tin atencion internacional mirando cu Aruba lo ta e prome pa hinca esaki den un bachi legal y lo sirbi como ehempel pa otro paisnan tambe legalisa esaki.