ORANJESTAD, Aruba –Recientemente a tuma lugar otro Soccer Camp di cual Digicel tabata un sponsor orguyoso. A yuda e organisacion cu tent pa stadion, tasnan cu regalo, premionan pa e muchanan manera World Cup Soccer Balls y tambe door di sponsor muchanan pa participa den e Soccer Camp mes, ta inclui tambe un sosten financiero na e academia mes. Segun Nadine van de Woude, Marketing Executive Aruba; “Digicel ta sostene e tipo di actividadnan aki pa motibo cu 297 Soccer Academy ta logra cu nan camp, no solamente pa coach e muchanan den tecnicanan di futbol, pero nan tin tambe un acercamento holistico na deporte y nutricion di e hoben nan. Esaki nan ta logra door di incorpora por ehempel workshops di nutricion y estilo di bida saludabel, workshop anti-tentamento, yoga recreativo y nan ta ofrece educacion pa e curpa y mente, team-spirit y con pa trata otro. Cu e combinacion aki nan ta duna e muchanan e oportunidad pa evoluciona y siña mientras nan ta pasa un rato agradabel hunto”.

E prome dia di e camp a bay exitosamente cu presencia di Telefon pa Hubentud, unda cu a conoce tur amiguitonan nobo y a bisa NO na tentamento. Riba e di dos dia, nan mision tabata di mehora e habilidadnan di futbol y tambe bisa NO na droga y alcohol den e bon compania di Fada Aruba, cu a comparti informacion importante cu e muchanan. Esunnan cu a participa na e Soccer Camp aki a goza un mundo riba nan di 3 dia unda cu nan a haya e oportunidad di bishita Phillips Animal Garden. E di cuater dia tabata uno interesante tambe unda cu e conocido Rene Wild a papia riba salud y bienestar.

 
E ultimo dia tabata uno hopi special, mirando cu a invita e team di futbol di Special Olympics pa ta parti di e camp. Tres atleta di Special Olympics tabata presente e dia aki y e muchanan por a conoce e campeonnan personalmente y siña algun habilidad di e atletanan aki cu orguyosamente a representa nos isla na Abu Dhabi. 

Un actividad sumamente exitoso di cual Digicel ta hopi orguyoso di por a forma parti di dje, treciendo union den e atletanan. Digicel ta e sponsor principal di Special Olympics Aruba y ta sumamente contento cu e campeonnan por a comparti algun triki cu e muchanan cu a participa den e Soccer Camp, mirando cu Team Aruba a gana medaya di oro den futbol den e World Games na Abu Dhabi cu a tuma lugar den luna di maart 2019.

Sra. van der Woude a bisa tambe cu e ta hopi bunita pa mira Aruba su campeon nan di Special Olympics y e muchanan di e Soccer Camp pasa un rato agradabel hunto, mirando cu deporte ta loke ta unifica, sin importa di unda bo ta bin. Nos tur por siña di otro. Nos mester uza nos talentonan Arubano den e mihor manera posibel y laga nos chikitonan siña di esey.