Banco di Caribe ta felisitá tur hóben ku a partisipá
WILLEMSTAD: Resientemente Kòrsou tabata anfitrion di algun dia tremendo p’e deporte di natashon. A tuma lugá CARIFTA 2023 ku partisipashon di 21 pais. Alrededor di 470 atleta di natashon, a bishitá Kòrsou pa e “Carifta Aquatic Curaçao 2023”, ku a tuma lugá entre 6 i 10 di Aprel 2023. Esaki tabata e di 36 edishon di CARIFTA i ta di dos bes ku e ta tuma lugá na Kòrsou. E promé biaha tabata na 2005 i na e okashon ei tambe Banco di Caribe a sostené nos hóben atletanan.
E aña aki por a konta ku 21 pais ku a partisipá, entre otro, Aruba, Boneiru, Cayman Islands, Bahamas, Anguila, Sürnam, Barbados i Trinidad i Tobago. Kòrsou a saka kara ku 55 hóben den su delegashon. E kompetensia(nan) ku a tuma lugá na Pisina Bennie Leito, Pisina Enith Brigitha, Corendon Mangrove Beach Resort i Caracasbaai a konsistí di 4 kategoria akuátiko; “Beach Waterpolo”, “Artistic Swimming”, “Speed Swimming“ i “Open Water Swimming”.
Banco di Caribe ta felisitá Curaçao Aquatic Association ku huntu ku tur partner a aseptá e reto di un biaha mas fungi komo pais anfitrion i organisá e evento riba un nivel eksepshonal. Pabien na tur mayor i boluntario ku a pèrkurá di pone mannan huntu i hasi ku e hóbennan por a enfoká riba nan kompetensia. Banco di Caribe ta orguyoso di a forma parti di un evento manera CARIFTA, ku ta krea oportunidat pa atletanan demostrá nan talento i interkambiá ku otro den un ambiente kompetitivo.
Pabien na tur e atletanan ku durante di e último lunanan a prepará intensivamente pa por a duna un bon prestashon durante CARIFTA 2023, spesialmente e hóbennan ku a destaká den nan respektivo kategoria, Adreia Ferreira (Speed Swimming), Dellany Almandriz Prieto, Grace Borrechach i Kyra van den Berg (Artistic Swimming). Mester felisitá e partisipantenan di Beach Waterpolo tambe ku a duna un tremendo kompetensia ekshibishonal i asina demostrá nan talento deportivo. Riba e imágen por tuma nota di e partisipantenan durante e diferente kompetensianan di “Carifta Aquatic Curaçao 2023”,