WILLEMSTAD – Resientemente Carnival Cruise Line a duna Atlantis Adventures Curaçao e prestigioso premio “Caribbean’s Leading Tour Operator” award pa nan tremendo trabou realisá den 2017.

Atlantis Adventure Curaçao, tantu staf i personal ta sumamente orguyoso ku un kompania prestigioso manera Carnival Cruise Line a duna nan e premio aki. Den pasado resien ya kaba Atlantis Adventure Curaçao a yega di gana e prestigioso premio aki na un okashon esta na 2015 i awor ta pa di dos biaha ku nan ta gana esaki na 2017. Atlantis Adventure Curaçao a kuminsá operá riba nos Isla na  1995 komo Shorex i na 1999 e nòmber a kambia den loke ku e ta awe, esta Atlantis Adventure Curaçao.

Pa Sra. Edmee Isidora, Manager di Atlantis Adventure Curaçao ta un honor ku nan por a gana e premio aki.  Esaki ta resultado di e servisio di kalidat ku nan guia ta duna na e turistanan ku bishita nos Isla, kombiná ku disiplina enorme i ku tournan di promé klase. Atlantis Adventure Curaçao ta gradesí tur su guianan, su shofùrnan i tambe otro personal ku a kontribuí pa nan por a bini na remarke pa di dos biaha risibí e premio aki.

Temporada 2018/2019 ta den porta, i Atlantis Adventure Curaçao lo sigui ku  e mesun bon trabou pa asina ei bende Kòrsou na un manera profeshonal.