E premio a keda entrega djarason último pa Carnival Cruise Line

WILLEMSTAD – Resientemente e empresa di Tour na Kòrsou  Atlantis Adventures, a keda informá pa representantenan di Tour Operation,  di Carnival Cruise Line, ku  Atlantis Adventures Curaçao a bira ganador di e premio prestigioso:

Caribbean’s Leading Tour Operator award

Den un karta ku a bai pa Direktor di Atlantis, Sr. Reinder Fit,  representantenan di Carnival Cruise Line ta felisitá  e kompania Atlantis Adventures Curaçao i su empleadonan ku nan a traha na periódiko di turismo di 2015 i a keda  altamente gabá pa nan trabou realisá.

Carnival Cruise Line, mediante di su Vise Presidente Amilcar  “Mico” Cascais a mustra ku  e kompania di barku krusero na e momentunan aki ta un dje kompanianan ku ta  lidera den ofresé ekskurshonnan na tera i Atlantis Adventures Curaçao a resultá di ta number unu,  no solamente na reputashon, pero tambe di ta hiba  ekskurshonnan di promé klase,  tambe demostrando un liderato fuerte i  hibando un bon  direkshon den e diferente tournan.

Carnival Cruise Line ta mustra mas aleu den su karta ku no tin duda ku e kompania ganadó  di e premio aki lo  ser papia pa hopi tempu, indikando ku Atlantis Adventures Curaçao ta un lider den e industria aki.

Edmee Isidora, Manager di Atlantis Adventures Curaçao ta sumamente orguyoso di e  logro aki. “Pa nos ta un plaser di no solamente di por a risibí e award aki, pero nos ta sumamente orguyoso pa e forma ku kada un di nos guianan a bin ta traha, bendiendo e produkto Kòrsou”, asina Sra. Edmee Isidora a duna di konosé.

Djarason último dia 26 di òktober, representantenan di  Carnival Cruise Line a hasi entrega di e plaka Caribbean Leading Tour Operator Award na e kompania di tour lokal. Mester mustra ku ta trata aki di un award komo e mihó kompania di tour di hinter área di Karibe.

E representantenan di Atlantis Adventures Curaçao ku a bai tuma e premio aki tabata Sra. Edmee Isidora ku ta manager dje kompania, Sra. Maja Atalita-Vervuurt,  Charinella Felomina i Richenella Roosje. Atlantis Adventures Curaçao ta sumamente kontentu di por a keda honrá ku e premio máksimo aki.