Willemstad – E famoso artista urbano yu di Kòrsou Dongo ku hopi hit manera entre otro ‘Barbershop’ lo ta e kara nobo di Landsloterij pa e kampaña ATA BO SA! E kampaña ta un kampaña di introdukshon di e logo i lema nobo ku resientemente a wòrdu lansa.

Ku e kolaborashon aki Landsloterij ta spera di komuniká ku e demografia di kumpradónan di brièchi mas hóben ku kada dia ta kresiendo mas i mas, pero tambe ku e fiel kumpradónan ku ta gusta tur inovashon ku Landsloterij ta bini kuné.

Komo Landsloterij su embahador, Dongo lo tuma parti na diferente aktividat nan promoshonal. Lo e aparesé riba ‘billboards’, duna entrevista, hasi propaganda den korant i medionan sosial. 

Dia 4 di Aprel próksimo Landsloterij lo rifa un kantidat grandi di premio durante e di dos sorteo mionario di aña 2019. E tres premionan mayó pa e sorteo aki lo ta ang. 1.000.000, ang. 200.000 i ang.100.000. Ademas di e premionan mayó e sorteo aki lo konta ku 2446 premio mas, inkluyendo e premionan derivá. Landsloterij ta invitá pueblo di Kòrsou kompletu pa kumpra nan brièchi pa nan ta den e wega mionario aki.  E preis pa un tabla di brièchi ta ang. 160,- i un pida ta ang. 16,-.

Di e forma aki Landsloterij ta spera di por sigui motivá komunidat pa siguí sostené su  loteria nashonal. Pa mas informashon di Landsloterij i e kampaña, Ata bo Sa!, huntu ku Dongo bishitá www.landsloterij.org,  e página di Facebook di Landsloterij: www.facebook.com/landslotterij òf e página di Instagram di Landsloterij.