Willemstad – Pa prome di desèmber último un grupo di invershonista bou di giya di e aktual CEO Sepp Koster, a tuma over Blue Bay Curaçao Golf & Beach Resort for di e herederonan di Raspoort. E doñonan nobo tin un plan amplio ku e resort ku tabata den hopi desaroyo e último añanan.

Sepp Koster for di aña 2005 ta na mando na e resort, kaminda mas ku 250 hende ta traha. E ta nietu di defuntu Steef Raspoort (ku a fayese den 2007), i ku ta e persona ku den aña 1997 a kumpra plantage Blauw  i a buta e fundeshi pa e desaroyonan aktual. Koster ta awor e akshonista prinsipal i huntu ku su ko-invershonistanan a tuma tur e akshonan di e famia over. Koster:” mi ta hopi orguyoso ku mi por kontinua ku e trabou di mi wela i sigi desaroyá e resort. E último añanan a bai hopi bon i ku e eksperensha ku nos tin awor, nos por a duna rumbo na nos vishon pa futuro. Entre otro pa medio di asaki nos a logra haña invershonistanan i huntu ku nos banko di kas Maduro & Curiel’s Bank, por realisá nos plannan den e añanan binidero”.

Ultimo tempu tabata tin hopi desaroyo na Blue Bay. E resort ta 220 ha grandi i ta wordu kontinuamente vigilá. Den tur e añanan más ku 300 kavels a wordu bendí i más ku 400 kas i apartamento a wordu trahá. Tin un playa privá i tambe 3 restaurant, bar, un skol di sumbuya, un organisashon di hotel ku 180 kas di vakashon i apartamento, i naturalmente un 18 hole golf course.

E doñonan nobo tin plannan amplio pa e Resort. Sepp Koster:”Den e 10 añanan binidero nos ta bai desaroyá e partinan di más bunita i balioso di e resort.  Den e prome 3 añanan nos lo dirigí nos mes prinsipalmente riba e desaroyo di 9 kavel di beach úniko, 27 apartamentu luhoso  i 5 penthouse ku ta keda situá riba e playa i e renobashon di Landhuis Blauw.  Debí na e plannan, e eskpanshon di e direktiva ku bon konosementu den kunstrukshon ta importante. Pa e motibu aki nos ta entusiasmá pa introdusí den nos direktiva komo direktor desaroyo di proyekto e experto Walter Hofstede, ku a bini for di Jansen de Jong Caribbean, tambe konosí komo e desaroyadó di e eksitoso Eigen Woning Plan,Spanish Waterview i diferente proyekto na Coral Estate.

Banda di Koster i Hofstede e direktiva di Blue Bay ta konsistí di Stefan Dubbeling (operashonál), Rogier van der Meer (komersiál) i Ijede van der Kooij (finansas).