Dia 2 i 3 di yüni den Curaҫao Festival Center
WILLEMSTAD: E wikènt di 2 & 3 di yüni ta premirá di bira unu grandi! Kòrsou ta kla pa eksperensia su promé edishon di Caribbean Sun Splash Festival ku artistanan di renombre internashonal den R&B, Hip Hop, Soul i AfroBeat. Bishitantenan di e festival lo haña un eksperensia total den Curaçao Festival Center ku diferente área; entre nan un ‘foodcourt’, un área eksklusivamente pa presentashon di DJnan internashonal i naturalmente e área mas grandi, pa e konsiertonan. Caribbean Sun Splash Festival ta den full preparashon pa un espektákulo ku un ‘line-up’ di 12 artista ku fama mundial inkluyendo Ashanti, JaRule i e aktual sensashon Rema.
Ashanti, JaRule, Rema i 10 otro artista internashonal mas…
Riba djabièrnè dia 2 di yüni lo presentá e semper popular i sensual, ganador di Grammy Award Ashanti i e multi-nominado di Grammy Awards JaRule; kual huntu tin e kansion hit ‘Mesmerize’ ku te dia di awe ta wòrdu toká i skuchá rònt mundu. Ademas di presentá kada un, riba nan mes, nan lo presentá huntu tambe. Ashanti i JaRule ta aktualmente riba un ‘tour’ i algun presentashon masha eksitoso. Djasabra dia 3 di yüni lo tin presentashon di e fenomenal artista di afro-beat Rema ku ta dominando tur tòp mundial ku su hit ‘Calm Down’. Meskos ku ‘Soundgasm’, ‘Calm Down’ tambe ta kibra rekòr ku mas di 440 mion views riba YouTube i kreando mas di 4 mion video riba TikTok . Rema a debutá na 2019 ku su kansion ‘Dumebi’ pero tabata ‘Calm Down’ ku a pone e artista aki riba plataforma internashonal hasiendo di Rema, un artista prominente den e género afro-beat!
E promé Caribbean Sun Splash Festival
Keda pendiente di bo radio-emisora faborito i partisipá na e diferente kampañanan di promoshon. Miéntras e dianan ta aserkando lo tin diferente ‘gimmick’ di manera ku tur fanátiko por eksperensia e promé edishon di Caribbean Sun Splash Festival. Karchinan ta optenibel na Van den Tweel Zeelandia, 24 Uur uit De Muur Sta. Maria i Madero Boutique na Mambo Beach. Pa mas informashon por bishita https://tibbaa.com/SunSplash.