Aruba Tourism Authority ta sigui habri mercadonan nobo Un experiencia special
ORANJESTAD – E diversificacion y expansion di mercadonan di turismo pa Aruba ta sigui. Paraguay ta un di e paisnan di Latino America cu un situacion economico stabil y pa tal motibo ta expande e conexionnan entre Aruba y e pais aki, creando oportunidad pa habri un mercado nobo mas pa e industria turistico. Recientemente, Aruba Tourism Authority y socionan manera Divi Aruba All Inclusive y Riu Palace Antillas a organisa un caluroso bonbini y bunita estadia, cu un programa hopi activo pa Copa Vacations Paraguay. E grupo a consisti di 10 di e tour operatornan mas grandi di Paraguay. Nan a wordo compaña pa un representante di Copa Airlines y un representante di A.T.A. Chile. Aruba tin vuelo y tin e capacidad di stoel entre otro cu Copa pa por comodamente cuminsa invita turistanan di Paraguay pa cera conoci cu nos isla.
A ofrece e grupo un programa hopi activo y atractivo cu a duna nan un bon impresion di e servicio y productonan cu ta disponibel y un ‘sabor’ di Aruba su ofrendanan culinario. Aruba Tourism Authority y su partnernan tabatin como obhetivonan pa provee Aruba cu un oportunidad significante pa expone e destinacion, e acomodacionnan cu ta disponibel y diferente atraccion. Pa medio di tripnan di familiarisacion, tour operatornan ta haya e oportunidad pa cera conoci miho cu e destinacion y asina por bend’e cu mas facilidad tambe. Nan ta establece amistadnan y contactonan cu ta facilita ora cu nan mester di un partner na Aruba pa provee nan clientenan cu cualkier servicio of asistencia.
Un tour asina ta fortalece e relacionnan entre e tour operatornan, e aerolineanan, A.T.A. y partnernan local. E ta un bon ocasion tambe pa presenta tur e ‘updatenan’, plannan y proyectonan di Aruba y di e aerolineanan.
E tour operatornan a keda impresiona cu e infrastructura, e servicio y e hotelnan, pero specialmente cu e beachnan como cu na Paraguay nan no tin beach. Entre e invitadonan tabatin dos tour operator cu ta specialisa den ‘Weddings’ y Aruba ta un destinacion ideal pa nan clientenan, tanto pa casamento como pa honeymoon. Pa duna informacion relaciona na e ‘niche’ aki, Aruba Tourism Authority a invita Lissy Lampe di ‘Ceremonies & Celebrations in Aruba’ pa haci un presentacion. Di parti di A.T.A., Darice Solognier a duna un presentacion cu ta wordo referi na dje como ‘One Happy Romance’ y a cera e anochi cu e invitadonan cu un cena den e patio di La Trattoria El Faro Blanco Restaurant.