Ban para como “TWAALDE MAN” tras di Aruba!

Oranjestad,– Diabierna siman pasa AVB a anuncia oficialmente e wega amistoso entre e ekipo di Aruba y ekipo di Guam cu lo tuma lugar dianan 27 y 30 di maart pa 8or na Compleho Deportivo Guillermo Prospero Trinidad. “Pa nos ta un orguyo di por anuncia e wega aki”’ asina Presidente di AVB Richard Dijkhoff a cuminsa ta bisa diabierna ultimo. “Despues di a ricibi un mail di Federation di Guam siman pasa dibiaha nos a bisa si na esaki. Tur esaki a cuminsa cana despues cu Sr. James Hepple di AHATA a aserca nos cu e tin un request di un bon amigo di dje cu ta Sr. Gary White.” Gary White ta un di e top coaches nan na mundo awor aki y cu ta entrenador di e ekipo di Guam. E ekipo di Guam lo yega Aruba dia 23 di maart y lo wordo transporta cu busnan di the Palm Tours pa nan hotel cu lo bai bira Tropicana Hotel. Palm Tours lo bira e transporte oficial pa e ekipo di Guam como tambe e ekipo di Aruba. Guam cu ta posiciona puesto 160 riba e FIFA World Rakings lo presenta cu su hungadornan Profesional cu ta hungando den MLS na Merca como tambe cu su amateursnan cu ta hunga na entre otro Malaysia y Indonesia. Esaki kiermen cu Guam lo bini “Full Force” pa bataya Aruba. Aruba cu ta posiciona puesto 172 riba FIFA World Ranking tambe lo presenta cu su mihor ekipo cu lo consisti di hungaodrnan di Division Honor como tambe amateurs nan di Hulanda. “Mi ta hopi orguyoso di por forma parti di AVB y pa anuncia e wega aki hunto cu nos Presidente. Nos ta e prome bond den CONCACAF cu ta logra un wega contra un pais di un otro bond cu ta di ASIA PACIFIC FEDERATION”, asina aki Marketing Manager di AVB Jeff Lopez tambe a bisa. “Ora di mundial nos tur di Aruba ta briya cu nos t-shirt di nos ekipo favorito. Awor ta nos chens pa para tras di nos propio ekipo nacional como e Twaalfde man y asina apoya nos pais.” Entrada pa e tremendo wega aki lo ta unicamente AWG.12.50 pa persona y muchanan bow di 10 anja ta drenta pornada. Na porta e entrada lo bira AWG.17.50 pa persona. Tickets nan ta obtenibel na Technical Center Angel Botta na Stadion di Frans Figaroa. AVB ta bezig si ta busca mas lugar di benta pa asina haci esaki mas acsecibel pa pueblo di Aruba. AVB kier a gradici su sponsornan CMB cu ta yuda cu un parti financiero pa carga e gasto nan. Como tambe Insel Air cu lo bin cu e FIFA official Referees nan di Venezuela. The Palm Tours cu ta bira e transporte oficial di e ekipo di Guam y ekipo di Aruba. Subway cu lo yuda ambos ekipo cu nan subs nan fresco. Tropicana pa nan acomodacion nan pa e ekipo di Guam y por ultimo MIO Wireless cu lo zorg pe e hungadornan keda encontacto cu nan cas. Ban uni nos mes e para tras di nos pais dianan 27 y 30 di maart y asina apoya nos Seleccion Nacional. Pa mas informacion por subi www.avbaruba.aw of e Facebook page di AVB Aruba.