E revista oficial di carnaval di Aruba a yega

ORANJESTAD, Aruba – Januari 2016: Aruba Tourism Authority, hunto cu e redaccion y produccion di e revista oficial di Aruba su Carnaval, ta anuncia cu e edicion 2016 di Bacchanal a yega. For di su introduccion Bacchanal a conta cu e sosten di ATA y hunto a sigui modernisa y introduci innovacion den e forma di presenta e revista y productonan relaciona na dje.

Diferente cu añanan anterior, e aña aki e website di Bacchanal ta presenta hunto cu ATA e Bacchanal “Parade Tracker”. E instrumento aki ta haci posibel pa tur hende sa den “real time” unda exactamente e cabes di e diferente paradanan ta, y por sigui esaki riba di e websitenan www.aruba.com y www.arubabacchanal.com.

E portada di Bacchanal 2016 ta presenta un participante den parada cu ta expresa e esencia di Carnaval. Baile y e colornan vibrante caracteristico di nos Carnaval y e alegria di e comunidad amante y sostenedo di Carnaval ta e elementonan central.

Semper Bacchanal a presenta componentenan clave di Aruba su Carnaval riba su portada, pero e aña aki a opta pa cambia e concepto di e portada y a scoge pa e Carnavalista Roxana Effer-Rodriguez pa refleha e concepto di Carnaval.

Gerencia y personal di Aruba Tourism Authority ta contento di por yama Bacchanal 2016 bonbini y cu hopi placer a ricibi e prome copia oficialmente e siman aki