Aruba Electric Festival ta surpasando tur expectativa

Cu extra interes for di Merca, Venezuela y Hulanda

ORANJESTAD, Aruba – 5 di september 2013: For di momento cu Aruba Tourism Authority a acepta pa ta un partner den e evento aki, nan meta principal tabata pa atrae turismo pero tambe pa promove nos isla den un mercado considera como nobo pa cu nos turismo. ATA ta convenci cu via un evento asina, ta logra yega na e generacion Y, tambe conoci como “baby boomers”. Ronella Tjin Asjoe-Croes, CEO di Aruba Tourism Authority tabata presente diaranson mainta na Nikky Beach, pa papia cu e organisadonan y mira con leu preparacionnan pa e evento ta andando. Ey a tende cu e preparacionnan, instalacionnan di ekipo ta hasta un dia adelanta. “Nos ta hopi satisfecho te na e momentonan aki. Nos a surpasa e meta caba cu nos a proyecta pa e evento, relaciona cu e cantidad di bishitante pa nos isla. Tur esaki mientras cu esaki ta e simpel lansamento di e evento, cu ta cuminsa otro aña. Pa 2014 lo tin e parti mas interesante na unda cu lo tin e aspecto di conferencia cu lo atrae esunnan den mundo di musica pa asina reuni na Aruba, manera entre otro productornan, doñonan di studio di grabacion, musiconan y DJ nan”, asina Ronella Tjin Asjoe-Croes a splica. El a conta mas leu cu te ainda Merca ta e mercado na unda tin mas carchi bendi internacionalmente, sigui pa Venezuela, Hulanda, Brazil, Italia, Spaña, Irlanda y otronan. Aruba Tourism Authority ta contento cu e Electric Festival ta halando extra atencion for di otro mercadonan cu nos no ta custuma cune, pues mas cu djis Merca y Venezuela so. Esey riba su mes ta demostra un interes grandi di e hoben profesionalnan pa cu e genero di musica aki. Aruba ta e prome destinacion den Caribe cu ta organisando un tipo di festival asina aki y un bes mas ta “trendsetter” pa otro destinacionnan. Ya caba tin confirmacion di 70 miembro di prensa biniendo Aruba, variando for di Merca, Europa y Latino America. Lo bin “E Entertainment” di Merca, “Parool” di Hulanda, “CNN” di Chile, “Caracol” di Colombia y varios otro media mas cu ta cubri mercadonan grandi y interesante pa nos turismo. Aruba Tourism Authority a bisa di ta trahando den cooperacion estrecho cu e organisadonan, pa por ricibi medionan di comunicacion internacional y pa e cantidad di turistanan yegando nos isla. “Laga nos tur prepara pa un otro fin di siman exitoso pa nos turismo”, asina Ronella Tjin Asjoe-Croes a termina bisando cu un sonrisa di satisfaccion riba su cara.