ORANJESTAD, Aruba – November 2015: Tradicionalmente e bishitante di estadia Venezolano ta scoge pa un estadia na un hotel of condominium, e ta frecuenta tienda y restaurantnan. Esaki ta e turista cu Aruba ta custumbra cun’e pa hopi decada caba ora ta trata di e mercado di Venezuela. Na aña 2014 a nota un trend nobo, un segmento nobo di turista Venezolano cu ta keda Aruba un anochi so, uzando e isla como “hub” pa otro destinacionnan. Esaki ta debi na e hecho cu mayoria aerolinea internacional a corta den e cantidad of a elimina nan vuelonan pa Venezuela despues cu el a bira sumamente dificil pa nan repartria nan ingresonan na doler mericano. Ademas, e gobierno di Venezuela a cuminsa exigi pa operadornan di viahe bende nan ticketnan na bolivar. Den e ultimo cuater añanan yegadanan di bishitante di estadia di nacionalidad Venezolano a crece cu un promedio di 29%. E segmento ariba menciona a contribui na un crecemento explosivo mediante anja pasa y te cu practicamente promer cuartal di e anja aki. En total e mercado di Venezuela a aumenta cu 46% den e prome nuebe lunanan di aña 2015, compara cu e mesun periodo na 2014. Recientemente e segmento di viajero nan cu ta bishita pa hanja acceso na doler a bin ta crece na un manera preocupante. Pero no solamente el a crece, pero tambe e grupo aki ta desplega comportacionnan cu ta causa preocupacion grandi. Esaki ta motibo pa inkietud grandi di parti di Aruba Tourism Authority, mescos cu pa otro nan tambe. Ronella Tjin Asjoe-Croes, Chief Executive Officer di Aruba Tourism Authority a splica cu pa e ultimo añanan y lunanan a analisa e mercado aki continuamente mas den detaye, na final di dia e mercado aki ta sumamente importante pa Aruba y hopi ta esnan cu ta depende di esaki. E segmento nobo, ademas di influencia e promedio di ingreso for di turismo na un forma no desea, ta desplega un comportacion cu ta trece numeroso keho di parti di nos localnan como tambe otro turistanan cun’e. A.T.A. ta pidi pa atencion pa practicanan ilegal cu a surgi cu presencia di e segmento nobo aki, como tambe atencion pa e sentido di insiguridad bou di nos localnan, competencia inhusto,  falta di habilidad pa e infrastructura carga e desaroyo aki responsablemente y e actitud di intimidacion y molester cu no ta aceptabel. Mester introduci medidanan urgente pa mitiga e efectonan di nan comportacion riba e impresion no semper positivo cu esaki ta causa cerca otro turistanan, pero tambe hendenan local.

A.T.A. pa algun tempo caba a bin ta haciendo esfuersonan grandi pa asisti unda cu ta posibel, por ehempel cu conseho y datonan, como tambe inversion di fondo pa asina yuda maneha varios reto cu ta confronta riba nos pais cu e segmento di bishitante nan aki. Trahando cu diferente instancia y organisacion manera inmigracion, e aerolineanan Venezolano, departamento di aviacion civil, DIMAS, departamento di asuntonan exterior y departamento di siguridad nacional, ta trata di diferente manera pa alivia por ehempel e fluho di pasahero na yegada y salida di Aruba y haci control di calidad di acomodacionnan alternativo manera cas di famia y apartamento cu ta creciendo den cantidad pa acomoda e mercado aki. Tambe A.T.A. ta traha den colaboracion cu servicio di impuesto pa sigura cu impuestonan manera impuesto di turismo y otro impuestonan ta wordo paga manera mester ta, y ta provee datonan encuanto di e fluho migratorio for di Venezuela pa Aruba. A.T.A. ta reconoce cu instancia nan asina ki tambe tin nan man nan yen y ta confronta reto pa cu maneho di e fluho di bishitante cu comportacion no desea y no acceptabel basicamente. A.T.A. ta gradisi pa e colaboracion y ta balora esaki masha. Ronella Tjin Asjoe-Croes a expresa: “Ta esencial pa mantene semper central e importancia di mercado Venezolano, y tene den mente cu e desaroyo actual no ta e “norma”. E desaroyonan y desenvolvimento historicamente di e mercado Venezolano ta hopi diferente di locual e segment aki ta desplega. Aunke e mercado a yega di mustra caida, semper e mercado Venezolano a bin bek y sigui crece. Tradicionalmente e bishitante Venezolano ta esun cu ta gasta mas na Aruba y ta entre e mercadonan cu tin e “average daily tourist spending” di mas halto.” E bishitante cu ta biaha pa adkiri dolar no ta representa e segmento cu Aruba y esun cu A.T.A. ta enfoca riba dje y ta trata na atrae, Tjin Asjoe-Croes a agrega. A.T.A. y e sector di turismo ta preocupa cu e segmento aki por tin un impacto negativo riba Aruba su desenvolvimento y riba un desaroyo sostenibel di nos industria turistico. Mester tene consideracion cu e hecho cu ora ta papia di e mercado Venezolano, ainda esaki ta keda un contribuidor grandi pa cu “tourism receipts”. Sinembargo maske cu ingreso pa medio di Turismo (“tourism receipts”) ta sigui crece, danki tambe na entre otro e mercado di Merca cu a crece cu 8.7% te cu September di e anja aki, e segmento nobo cu ta cada dia mas activo, ta wordo considera e contribuidor principal na reduccion den “average daily tourist spending”. E turista aki no ta keda den hotel, pero ta scoge pa apartamentonan y casnan di famia y ta biniendo den cantidadnan grandi cu por of ta infuencia e isla su capacidad di carga (“carrying capacity”), e sentido di siguridad, salud publico, “fair trade” y mercado laboral etc.

Comparando 2014 cu 2013, cifranan ta mustra cu turistanan a gasta menos pa persona, esta 376 florin pa dia na 2013 y 373 florin pa dia na 2014. Ora compara e ultimo cuartal di 2014 cu e ultimo cuartal di 2013, e cifranan ta indica un reduccion di 4.4% den e suma cu e turista ta gasta averahe pa dia na Aruba. A.T.A. ta sigui monitor e posicionamento di Aruba su imagen y experiencia, como tambe e impacto di e fluhonan di bishitante riba Aruba su “stay-over arrivals” y e gastamento en general, y cu esaki e contribucion general di GDP di e isla. A.T.A. ta satisfecho cu e medidanan nobo  cu a wordo introduci recientemente y ta contento pa mira cu Gobierno tambe ta escalando accion nan tratando e asunto aki riba nivel di Reino tambe entre otro. Enre otro “Asistencia riba nivel di proteccion di frontera ta esencial”, e CEO di A.T.A. a laga sa. Na april 2015, A.T.A. a indica den un carta na Minister di Turismo cu e tempo a yega pa discuti e situacion den e mercado Venezolano y con pa preveni impactonan potencialmente negativo pa medio di implementacion di posibel restriccionnan pa cu bishitantenan yegando Aruba. Gobierno a entre otro introduci 100% control na yegada, cu ta ser efectua pa departamento di imigracion. A.T.A. ta di opinion cu mester sigui considera e aspecto di restriccion pa cu bishitantenan pa Aruba, sinembargo mester sigura cu un medida ta wordo maneha manera mester ta pa Aruba por keda un destinacion atractivo pa e turista Venezolano tradicional. Ta imperativo pa introduci medidanan practico pa para e situacion indeseabel cu ta influencia e industria turistico y consecuentemente tin efecto negativo riba nos economia cu ta asina dependiente di turismo, como tambe riba e paz y harmonia di e comunidad y nos bishitantenan. Mester realisa si cu medida nan cu gobierno Venezolano mes ta tuma ta sea condusi na desaroyo nan asina of ta disminui esaki nan. Fluho di e bishitante nan bou di e segmento nobo aki ta puramente ‘consecuencia’ di e situacion na Venezuela y cambio nan den maneho eynan dor di autoridadnan eynan ta resulta den locual nos ta mira aki nan. Ronella Tjin Asjoe-Croes ta comparti cu A.T.A. ta boga pa un plataforma amplio pa dialogo riba e topico aki cu ta inclui entidadnan gubernamental, N.G.O. y sector priva pa asina intercambia di idea, pensamento y bin cu un aceracamento integral pa adresa e preocupacionnan actual. Esaki mester ta un prioridad y ta sumamente necesario. Finalisando, E C.E.O di Aruba Tourism Authority ta remarca cu nan ta cla semper pa asisti unda ta posibel y ta reconoce cu e situacion aki tin e atencion urgente di e mandatario encarga cu Turismo, como tambe otro mandatario nan y instancia nan.